Héraðsdómur Reykjavíkur hefur dæmt Lárus Má Hermannsson í 30 daga skilorðsbundið fangelsi fyrir að ráðast á lögreglumann í fangageymslu lögreglustöðvarinnar við Hverfisgötu í Reykjavík aðfaranótt 3. febrúar 2024.
Samkvæmt dómnum var Lárus handtekinn vegna annars máls og var þá undir verulegum áhrifum áfengis. Þegar lögreglumenn voru að færa hann inn í fangaklefa streittist hann á móti, setti hendur á milli hurðar og stafs og veittist síðan að lögreglumanni. Hann sló til lögreglumannsins, reif fjarskiptabúnað af höfði hans og olli rispu aftan á hálsi hans.
Lárus neitaði fyrir dómi að hafa ætlað að meiða lögreglumanninn. Hann sagðist hafa fallið á áfengisbindindi sínu eftir átta ára edrúmennsku vegna erfiðra aðstæðna í kjölfar andláts móður sinnar og muna lítið sem ekkert eftir atvikunum. Hann viðurkenndi þó að hafa reynt að koma í veg fyrir að fangaklefanum yrði lokað og sagðist hafa fundið fyrir innilokunarkennd.
Dómurinn taldi hins vegar framburð þriggja lögreglumanna trúverðugan og studdan eftirlitsmyndavélum úr fangageymslunni. Þar sjáist ákærði slá í átt að lögreglumanninum áður en hann var yfirbugaður og færður aftur inn í klefann.
Við ákvörðun refsingar leit dómurinn meðal annars til þess að rúm tvö ár voru liðin frá atvikinu og að dráttur á meðferð málsins væri ekki þeim ákæra að kenna. Einnig var litið til þess að hann hefði ekki gerst sekur um önnur brot frá því atvikið átti sér stað.
Refsingin var því ákveðin 30 daga fangelsi en fullnustu hennar frestað til tveggja ára, að því gefnu að hann haldi almennt skilorð. Þá var honum gert að greiða verjanda sínum, Vilhjálmi H. Vilhjálmssyni lögmanni, 706.800 krónur í málsvarnarlaun.
Sat áður inni fyrir manndrápstilraun
Lárus Már var árið 2005 dæmur fyrir tilraun til manndráps en þá hafði hann veist að fyrrverandi sambýliskonu sinni með felgulykli og veitt henni alvarlega áverka á höfði, á heimili hennar á Akranesi.
Hlaut Lárus Már fimm og hálfs ár fangelsi og var fyrrverandi sambýliskonu hans greiddar 700.000 krónur í miskabætur.
