Ingólfur Ásgeir Gíslason, lektor við Háskóla Íslands, gagnrýnir harðlega fyrirsögn í frétt RÚV um fundi Donalds Trump Bandaríkjaforseta með leiðtogum Úkraínu og Ísraels.
Fyrirsögn fréttarinnar hljóðaði á eftirfarandi hátt: „Fundir Trumps með leiðtogum Úkraínu og Ísraels afkastamiklir og jákvæðir.“
Í Facebook-færslu segir Ingólfur að orðalagið sé óásættanlegt í ljósi ástandsins á Gaza og þeirra ásakana sem beinst hafi að Ísrael á alþjóðavettvangi.
„Í dag, eins og aðra daga, myrti ísraelsher fólk í Palestínu. Leiðtoginn er enn eftirlýstur af Alþjóða sakamáladómstólnum (ICC). Sameinuðu þjóðirnar og öll mannréttindasamtök og samfélag fræðafólks á sviði þjóðarmorða er samdóma um að ríkið hafi og sé ennþá að fremja þjóðarmorð,“ skrifar hann.
Ingólfur bendir einnig á að Alþjóðadómstóllinn (ICJ) hafi komist að þeirri niðurstöðu að hernám Ísraels á Vesturbakkanum og Gaza sé ólöglegt og að öllum ríkjum beri skylda til að vinna að því að hernáminu ljúki.
Að mati Ingólfs endurspeglar fyrirsögn RÚV ekki þann veruleika.
„Í dag býður fréttastofa RÚV upp á móðgun við bæði eðlilega siðferðiskennd og vitsmuni. Illa er statt fyrir okkur,“ skrifar hann.
