Skjöldur Íslands, nýr hópur manna sem segist vilja sinna öryggisgæslu til að vernda konur frá útlenskum mönnum, fór í sína fyrstu hverfisgöngu síðasta föstudag. Þá deildu meðlimir hópsins myndböndum og frásögnum af svokölluðu afskiptaleysi lögreglunnar þegar erlendur maður var „sveiflandi sverðum“ á Ingólfstorgi. Var þetta ein af réttlætingum þeirra fyrir þörf á aðkomu þeirra að löggæslu og eftirlit á almannafæri.
Hér er sveðjumaður á Ingólfstorgi að leika listir sínar í gærkvöldi. Lögreglan virðist ekki kippa sér upp við þetta.
— Thorarinn Hjartarson (@TotiHjartar) July 19, 2025
En ekki gleyma því að það er að sjálfsögðu mjög óeðlilegt að telja þennan nýja veruleika að einhverju leiti óeðlilegan.
Í því felst jú umburðarlyndið. pic.twitter.com/BaEbJsYgP9
Meðlimir Skjaldar Íslands segjast hneykslaðar yfir því að lögreglan hafi einungis talað við manninn í myndbandinu en ekki fjarlægt hann eða tekið málið lengri. Maðurinn sést hins vegar oft á Lækjartorgi og setur hann reglulega upp skyndilegar götusýningar þar sem hann sveiflar geislasverðum, stöfum eða sverðum. Lögreglan er því kunnug um hátterni hans og þótti líklega ekki nauðsynlegt að grípa inn í það.
Maðurinn hefur komið fyrir í fréttum áður þegar foreldrum í Kópavogi varð brugðið við að sjá að hann var að kenna börnum í hverfinu sjálfsvörn. Maðurinn tók upp á því að kenna börnum og unglingum nálægt Hamraborginni tækni í skylmingum og sjálfsvörn. Meðferðis við þessa kennslu hafði hann kylfur, stafi og hnífa í bakpoka. Maðurinn deildi sjálfur myndböndum af atvikunum á netinu og fóru þau í dreifingu á hverfishópum á Facebook og voru foreldrar mjög ósáttir. Aðalvarðstjóri lögreglunnar í Kópavogi, Gunnar Hilmarsson, sagði í viðtali við DV í september 2024 að lögreglan væri að kanna málið.
Samkvæmt fréttum Vísis eru dæmi um að meðlimir Skjaldar séu með sakaferil að baki. Þá gaf hópurinn út yfirlýsingu í kjölfarið af umfjöllunum fjölmiðla í dag.
„Allt tal um rasista, nasista, þjóðernissinna og tengingu á merki okkar, letur og nafn hópsins er kjánaleg tilraun til að rakka okkur niður.“
„Allt tal um rasista, nasista, þjóðernissinna og tengingu á merki okkar, letur og nafn hópsins er kjánaleg tilraun til að rakka okkur niður. Auk þess er sú tilraun til að hjóla í fortíð okkar nokkuð sem við vissum að yrði. Við vissum að fortíð okkar yrði dæmd ... Kosturinn við fortíð okkar er það tækifæri að fá að breyta lífi sínu til hins betra og læra af henni, tileinka sér breytni og möguleika á að bæta. Við berum fortíð okkar vissulega en framtíð Íslands berum við öll. Þá vakt viljum við standa og köllum okkur því Skjöldur Íslands.“
Bent hefur verið á að merki Skjaldar er það sama og norski hryðjuverkamaðurinn og fjöldamorðinginn Anders Behring Breivik notaði á titilsíðu ávarp síns til væntanlegra fylgismanna.
