Matvælastofnun vekur athygli á innköllun á einni framleiðslulotu af kínversku kökunni Popping Candy Macaron Biscuit Strawberry Flavor, sem fyrirtækið Fiska.is flytur inn.
Ástæða innköllunarinnar er sú að varan fór inn á Evrópumarkað án þess að fara í lögboðið landamæraeftirlit í Hollandi vegna innihalds dýraafurða áður en hún var flutt til Íslands.
Tilkynning um vöruna barst íslenskum stjórnvöldum í gegnum RASFF, evrópska hraðviðvörunarkerfið fyrir matvæli og fóður. Innköllunin fer fram í samráði við Heilbrigðiseftirlit Garðabæjar, Hafnarfjarðar, Kópavogs, Mosfellsbæjar og Seltjarnarness.
Um er að ræða eftirfarandi framleiðslulotu:
- Vara: Popping Candy Macaron Biscuit Strawberry Flavor
- Vörumerki: GANGFU
- Framleiðandi: Fujian Gangfu Lebao Food Development Co., Ltd.
- Framleiðsluland: Kína
- Best fyrir: 15. mars 2027
- Strikanúmer: 5060886820975
- Nettóþyngd: 132 grömm
Varan var seld í verslun Fiska á Nýbýlavegi 6 í Kópavogi.
Viðskiptavinir sem hafa keypt kökurnar eru beðnir um að neyta þeirra ekki heldur farga þeim eða skila þeim í verslun Fiska á Nýbýlavegi þar sem þeir fá endurgreitt.
