Notendur Instagram geta ekki lengur sent svokölluð ofurörugg einkaskilaboð eftir að fyrirtækið ákvað að slökkva á enda-til-enda dulkóðun (E2EE) í skilaboðakerfi appsins um allan heim, í gær. Þetta kemur fram í frétt BBC.

Ákvörðunin markar mikla stefnubreytingu hjá móðurfélaginu Meta sem hafði áður lýst tækninni sem gullstaðli í persónuvernd á netinu.

Enda-til-enda dulkóðun er talin öruggasta form netsamskipta þar sem einungis sendandi og móttakandi geta lesið skilaboðin. Gagnrýnendur hafa þó lengi haldið því fram að tæknin geri yfirvöldum erfiðara fyrir að stöðva dreifingu skaðlegs eða ólöglegs efnis á netinu.

Með breytingunni mun Instagram nú geta nálgast innihald einkaskilaboða notenda, þar á meðal myndir, myndbönd og hljóðskilaboð.

Meta hafði árið 2019 lofað að innleiða enda-til-enda dulkóðun á samskiptakerfi Facebook Messenger og Instagram undir slagorðinu „framtíðin er prívat“. Kerfið var tekið í notkun á Messenger árið 2023 og síðar boðið sem valkostur á Instagram með það að markmiði að gera það sjálfgefið síðar meir.

Nú hefur fyrirtækið hins vegar hætt við þá áætlun eftir sjö ára þróunarvinnu. Framvegis verður aðeins boðið upp á hefðbundna dulkóðun á Instagram, sambærilega þeirri sem notuð er í þjónustum á borð við Gmail.

Skiptar skoðanir

Barnaverndarsamtök hafa fagnað ákvörðuninni. NSPCC, sem hefur lengi varað við áhættu tengdri enda-til-enda dulkóðun, segir tæknina geta auðveldað gerendum að fela misnotkun barna.

Persónuverndarsinnar hafa hins vegar gagnrýnt breytinguna harðlega. Big Brother Watch segir ákvörðunina vera skref aftur á bak og óttast að Meta sé að gefa eftir fyrir þrýstingi stjórnvalda.

Meta tilkynnti breytinguna ekki opinberlega heldur uppfærði skilmála Instagram hljóðlega í mars. Þar kemur fram að enda-til-enda dulkóðuð skilaboð verði ekki lengur studd eftir 8. maí 2026.

Fyrirtækið segir ástæðuna vera þá að of fáir notendur hafi kosið að virkja eiginleikann. Sérfræðingar benda þó á að notkun valfrjálsra öryggiseiginleika sé oft lítil þar sem notendur þurfi sjálfir að virkja þá sérstaklega.

Sumir sérfræðingar telja einnig að ákvörðunin tengist aukinni áherslu Meta á þróun gervigreindar. Victoria Baines, prófessor í upplýsingatækni við Gresham College, segir samskiptagögn notenda geta verið afar verðmæt við þjálfun gervigreindarlíkana.

Meta hefur áður sagt að einkaskilaboð á Instagram séu ekki notuð til að þjálfa gervigreind fyrirtækisins.

Á meðan halda mörg önnur skilaboðaforrit áfram að nota enda-til-enda dulkóðun sjálfgefið, þar á meðal Signal, WhatsApp, iMessage frá Apple og Google Messages frá Google.