Alls voru skráð 91 mál í kerfum lögreglunnar á höfuðborgarsvæðinu á tímabilinu frá 17:00 í gær til 05:00 í morgun og þegar þetta er ritað gista tveir einstaklingar í fangaklefa. Hér má sjá nokkur dæmi um verkefni lögreglunnar á tímabilinu.
Ungur ökumaður kítlaði pinnann fullmikið en lögreglan sem starfar á Hverfisgötunni stöðvaði hann á 91 km/klst þar sem hámarkshraði við bestu aðstæður er 40 km/klst. Samband var haft við foreldra ökumannsins vegna ungs aldurs hans.
Óskað var eftir aðstoð lögreglu á skemmtistað í miðborginni en þar voru dyraverðir með einstakling í tökum og þurftu aðstoð lögreglunnar við að koma honum í burtu af staðnum.
Þá óskuðu dyraverðir annars skemmtistaðar eftir aðstoð vegna einstaklings sem hafði verið í slagsmálum inni á staðnum. Dyraverðirnir voru með hann í tökum en lögreglumenn fjarlægðu einstaklinginn en eftir skýrslatöku hélt hann sína leið.
Höfð vöru afskipti af þó nokkrum einstaklingum sem grunaðir voru um vörslu fíkniefna og vegna ökumanna sem grunaðir voru um akstur undir áhrifum.
Einnig var óskað eftir aðstoð lögreglu á Bráðamóttöku Landspítalans vegna ölvaðs einstaklings sem var til vandræða. Lögreglan reyndi að koma honum heim til sín en þegar þangað var komið gerði hann sér lítið fyrir og bjó til vopn með því að setja steinhellu í sokk og sveifla í átt að lögreglumönnunum. Var hann því handtekinn og í kjölfarið færður á lögreglustöð og vistaður í fangaklefa þar til víman rennur af honum og hann verður viðræðuhæfur.
Lögreglan á Flatahrauni í Hafnarfirði handtók einstakling fyrir að fara ekki að fyrirmælum lögreglu. Var hann sótölvaður og vistaður í fangaklefa þar til rennur af honum og hægt verður að taka af honum skýrslu.
Aukreitis var óskað eftir aðstoð lögreglunnar í Smáralind vegna barna sem neituðu að yfirgefa verslunarmiðstöðina.
Sama lögreglan, sú sem annast útköll í Kópavogi og í Breiðholtinu, fékk tilkynningu um eld í ruslageymslu fjölbýlishúss en slökkviliðið sá um að slökkva eldinn.
