Eldfim ný heimildarmynd um hvarf Madeleine McCann varpar ljósi á ný og mögulega afdrifarík sönnunargögn sem kunna að styrkja þá kenningu að Christian Brueckners sé sá seki í málinu. Þetta er fullyrt í breska fréttamiðlinum Mirror.

Myndin beinist að vísbendingum sem fundust á felustað hans og gætu varpað ljósi á hvers vegna þýski ríkisborgarinn Brueckner er í brennidepli í einu umtalaðasta sakamáli heims, þegar Madeleine hvarf árið 2007.

Frá því Madeleine litla hvarf í fjölskyldufríi í Algarve fyrir 18 árum hafa vísbendingar verið af skornum skammti. Í myndinni eru sýndar óhugnanlegar uppgötvanir sem gerðar voru í yfirgefnu verksmiðjuhúsnæði Brueckners, auk þess sem fjallað er um sjúklegan áhuga hans á ungum börnum.

Heimildarmyndin, „Madeleine McCann: Inside the Secret Evidence“, fjallar meðal annars um barnasundföt og leikföng sem fundust á eign Brueckners. Þá greinir hún frá því að lögregla hafi fundið grímu, skotvopn og viðbjóðslegar sögur um barnsrán sem Brueckner skrifaði sjálfur.

Í einni slíkri sögu skrifar hann: „Mjög lítil stelpa gengur inn í herbergið. Hún er örugglega ekki eldri en fimm ára. Ljóst, sítt hár í tagli skoppar á eftir henni þegar hún kemur til mín. Mér líður eins og ég sé í paradís.“

Í annarri óhugnanlegri frásögn, sem Brueckner á að hafa skrifað, lýsir hann því að hafa notað eiturlofttegund, etervökva, á móður og barn fyrir utan leikskóla. Einnig er greint frá 80gb hörðum diski sem hafi gegnt lykilhlutverki í því að sannfæra rannsóknaraðila um að einblína á Brueckner.

Harðdiskurinn staðsetti Brueckner nálægt leitarsvæði við Arade-stífluna í Portúgal. Myndin greinir einnig frá því að Brueckner hafi skrifað að hann vildi „fanga eitthvað lítið og nota það í nokkra daga“. Hann hótaði einnig að það myndi ekki skipta máli þótt „sönnunargögnum yrði eytt á eftir“ áður en hann bætti við: „Ég mun gera margar kvikmyndir ... hehe.“

Lögregluskýrslur greina frá að þetta séu mikilvægustu upplýsingar sem komið hafa fram í málinu frá því þýsk yfirvöld tilkynntu árið 2020 að Brueckner væri aðalsakborningur í hvarfi Madeleine McCann.

Í myndinni kemur einnig fram að Brueckner hafi neitað að svara spurningum lögreglu og ekki gefið neina afsökun. Hann hefur þó ekki verið formlega ákærður fyrir hvarf eða hugsanlegt morð á Madeleine.

Í heimildarmyndinni er einnig viðtal við írska ferðaráðgjafann Hazel Behan, 41 árs, sem Brueckner var sýknaður af að hafa nauðgað árið 2005, í réttarhöldum í Þýskalandi á síðasta ári. Þar kemur fram að rannsóknaraðilar óttast að Brueckner muni taka leyndarmálin með sér í gröfina, án þess að veita fjölskyldu Madeleine nein lokaorð eða svör.

Síðasta leit að vísbendingum í málinu stóð yfir í þrjá daga í Praia da Luz í síðustu viku, nálægt þeim stað þar sem Brueckner er sagður hafa tjaldað á sínum tíma.

Þýskir rannsakendur fengu aðstoð frá portúgölsku lögreglunni og notuðu bæði gröfur og ratsjárbúnað til að leita í jörðu. Þrátt fyrir umfangsmikla leit fundust engin haldbær sönnunargögn.