Nýr íslenskur drykkjarframleiðandi, Gosfélagið, stefnir að því að hefja framleiðslu á Klaka á næstu vikum, en uppsetning framleiðslulína er nú á lokastigi. Gert er ráð fyrir að framleiðsla á Klaka í plastflöskum hefjist um mánaðamótin maí–júní og að dósaframleiðsla fylgi um mánuði síðar.
Vélbúnaður til framleiðslunnar barst til landsins fyrir helgi og verið er að setja upp tvær framleiðslulínur í nýrri, 2.000 fermetra aðstöðu félagsins í Hafnarfirði. Afkastageta verksmiðjunnar verður um 70 milljónir lítra á ári.
„Gosfélagið tók yfir sölu og dreifingu á Klaka og Djúsí klaka síðastliðið haust og nú er svo komið að Klaki í tveggja lítra plastflöskum er uppseldur. Nægar birgðir eru af Klaka í dós. Það styttist hins vegar verulega í að við getum aftur boðið upp á Klaka í nýjum, umhverfisvænni plastflöskum en áður,“ segir Brynjar Freyr Valsteinsson, framkvæmdastjóri Gosfélagsins.
Félagið byggir á innlendri framleiðslu og verður eitt af fáum fyrirtækjum á Íslandi sem framleiða íslenska gosdrykki. Vatnið sem notað er í framleiðsluna kemur úr Kaldárbotnum, sem þykja meðal hreinustu vatnslinda landsins.
„Við ætlum að verða leiðandi í framleiðslu óáfengra drykkja. Klaki hefur notið vaxandi vinsælda meðal Íslendinga undanfarin ár enda drykkirnir ferskir og svalandi. Með nýju framleiðslulínunni tryggjum við gæði og öryggi vörunnar en afkastagetan verður um 70 milljón lítrar á ári. Framleiðslan á Klaka er fyrsta skrefið en í framtíðinni stefnum við á að auka við hana og kynna til sögunnar nýja og spennandi drykki,“ segir Brynjar.
Að Gosfélaginu standa Brynjar Freyr og Kristján Elvar Guðlaugsson ásamt fjárfestunum Ásgeir Johansen og Loftur Bjarni Gíslason. Þeir tveir fyrrnefndu hafa yfir tveggja áratuga reynslu af dagvörumarkaði og framleiðslu drykkja hér á landi.
