Dósent í sjúkraþjálfun við Háskóla Íslands er meðal höfunda nýrra og uppfærðra ráðlegginga á vegum Evrópusamtaka um gigtarlækningar þar sem fólk með liðagigt er hvatt til að hreyfa sig meira. Ráðleggingarnar eru birtar í einu af virtustu vísindatímaritum heims á sviði gigtarlækninga Annals of the Rheumatic Diseases.
Denislav Orlinov, dósent í sjúkraþjálfun við Háskóla Íslands er meðal höfunda nýrra og uppfærðra ráðlegginga á vegum Evrópusamtaka um gigtarlækningar þar sem fólk með liðagigt er hvatt til að hreyfa sig meira.
Fólk með liðagigt veigrar oft fyrir sér að hreyfa sig þar sem það telur að einkennin muni versna við það en rannsóknir sýna glöggt að það er óhætt að hreyfa sig. Jafnvel lítilsháttar hreyfing yfir daginn getur bætt heilsu og lífsgæði.
Liðagigt nær yfir hóp liðasjúkdóma þar sem ónæmiskerfið ræðst á frumur í líkamanum með þeim afleiðingum að bólgur og skemmdir verða í liðamótum á útlimum. Undir slíka gigt heyra bæði sjálfsofnæmissjúkdómar og slitgigt og er liðagigt ein af helstu orsökum líkamlegrar fötlunar í Evrópu. Rannsóknir hafa enn fremur sýnt að þær bólgur sem fylgja sjúkdómnum geta ásamt kyrrsetulífsstíl aukið hættu á hjarta- og æðasjúkdómum, vandamálum tengdum efnaskiptum líkamans og ákveðnum tegundum krabbameins og þannig aukið enn frekar álag á heilbrigðiskerfi. Til að hindra framrás og fylgikvilla sjúkdómsins (króníska verki, þreytu og sjúkdóma) og fjölkvilla (t.d. hjarta- og æðasjúkdóma og efnaskiptasjúkdóma) er þörf á bæði lyfjameðferðum og annars konar meðferðum við sjúkdómnum. Hreyfing er talin ein öflugasta leiðin til að efla heilsu, virkni og lífsgæði fólks með liðagigt.
