Karlmaður hefur verið dæmdur í 12 mánaða fangelsi fyrir ítrekað og alvarlegt ofbeldi gegn sambýliskonu sinni á tímabilinu frá nóvember 2025 til mars 2026. Hann játaði sök fyrir Héraðsdómi Vesturlands og samþykkti jafnframt að greiða brotaþola 4,4 milljónir króna í miskabætur.
Samkvæmt dóminum beitti maðurinn konuna ítrekuðu ofbeldi í þremur aðskildum tilvikum.
Í fyrsta atvikinu, í lok nóvember 2025, réðst hann á hana utandyra þar sem hann sló hana ítrekað í andlitið, sparkaði í hana, tók hana hálstaki, kastaði henni í jörðina og dró hana eftir jörðinni. Konan hlaut áverka á andliti, hálsi, höndum og fótum auk þess að verða fyrir mikilli geðshræringu.
Í janúar 2026 tók hann harkalega utan um kjálka og háls hennar og kreisti, auk þess sem hann sló hana í höfuðið. Við árásina hlaut hún mar á hálsi og áverka á höfði.
Í mars sama ár réðst hann síðan á konuna á ný með því að slá hana í andlitið, þrýsta höfði hennar að hörðu yfirborði og taka hana hálstaki. Afleiðingarnar voru meðal annars kúla á enni, sár á nefi, gat á hljóðhimnu með blæðingu, gripför á hálsi og marblettir víðs vegar um líkamann.
Auk ofbeldisbrotanna var maðurinn sakfelldur fyrir að aka vörubifreið sviptur ökurétti í nóvember 2025. Hann missti stjórn á bifreiðinni og hafnaði utan vegar skammt frá gatnamótum Suðurlandsvegar og Ölfusvegar.
Við ákvörðun refsingar lagði dómurinn áherslu á alvarleika ofbeldisins, sérstaklega að árásirnar beindust ítrekað að höfði og hálsi brotaþolans, sem gæti haft mjög alvarlegar afleiðingar. Honum var þó gefið til málsbóta að hafa játað brotin tafarlaust og samþykkt bótakröfuna. Verjandi hans upplýsti jafnframt að maðurinn hefði leitað sér aðstoðar vegna áfengisvanda og snúið við blaðinu.
Dómurinn taldi þó brotin það alvarleg að ekki kæmi til greina að skilorðsbinda refsinguna.
Brotaþolan fær dæmdar 4,4 milljónir króna í miskabætur auk vaxta og dráttarvaxta. Þá var manninum einnig gert að greiða tæpar 2,7 milljónir króna í sakarkostnað.
