Óli Hjálmar Ólason, sjómaður og útgerðarmaður frá Grímsey, er látinn, 95 ára að aldri. Um langt árabil var hann meðal umsvifamestu útgerðarmanna eyjarinnar og helgaði stóran hluta starfsævinnar sjómennsku og útgerð.
Morgunblaðið greinir frá andláti hans.
Frá Grímsey gerði Óli út um árabil, fyrst á eigin vegum og síðar ásamt eldri syni sínum, Óla Bjarna. Feðgarnir hættu útgerð árið 2006 og lét Óli þá jafnframt af sjósókn.
Fjölskyldan, Grímsey og fiskveiðar skipuðu stóran sess í lífi Óla. Þá var hann mikill áhugamaður um enska knattspyrnu og fylgdist sérstaklega vel með gengi Liverpool.
Eiginkona hans, Halldóra Traustadóttir, lést árið 2011. Börn þeirra eru Óli Bjarni, Kristín, Sæmundur og Sigrún Birna.
Óli verður jarðsunginn frá Akureyrarkirkju 4. september næstkomandi.
