Alls gista sjö einstaklingar í fangaklefa á höfuðborgarsvæðinu eftir nóttina en frá klukkan 17:00 til 05:00 voru 102 mál bókuð hjá lögreglunni. Hér má sjá nokkur dæmi um verfkefni lögreglunnar á tímabilinu.
Lögreglan á Hverfisgötu hafði afskipti af einstaklingi sem var grunaður um vörslu fíkniefna. Við öryggisleit á honum fannst eggvopn sem var handlagt. Var hann látinn laus að lokinni skýrslutöku.
Fullorðinn einstaklingur var handtekinn á skemmtistað í miðbæ Reykjavíkur en með honum voru þrjú ungmenni undir aldri. Var einstaklingurinn drukkinn og hótaði lögreglumönnum líkamsmeiðingum. Var hann vistaður í fangaklefa þar til rennur af honum og hann verður viðræðuhæfur. Foreldrar ungmennanna komu á lögreglustöðina auk fulltrúa barnaverndar, þar sem rætt var við þau um málið.
Sama lögregla fékk tilkynningu um umferðaóhapp en annar ökumaðurinn var grunaður um ölvun og var því handtekinn og vistaður í fangaklefa, þar til hann verður viðræðuhæfur. Samkvæmt dagbók lögreglunnar varð lítið tjón í óhappinu og engin slys á fólki.
Þá barst tilkynning um einstakling sem svaf ölvunarsvefni á tröppum veitingastaðar. Var hann vakinn og hélt hann sína leið.
Einnig fór sama lögreglan á skemmtistað vegna tilkynningar um slagsmál. Var einn einstaklingur handtekinn grunaður í málinu en var hann látinn laus að lokinni skýrslutöku.
Þó nokkur var um að bifreiðar voru stöðvaðar vegna gruns um að ökumenn væru undir áhrifum áfengis eða fíkniefna og í sumum tilfellum bæði.
Lögreglan sem annast útköll í Hafnarfirði, Garðabæ og á Álftanesi hafði afskipti af pöddufullum einstaklingi sem var að ganga á milli bíla. Var hann vistaður í fangaklefa þar til rennur af honum.
Sama lögregla stöðvaði tvær bifreiðar vegna gruns um ölvun ökumanns og tveir aðrir ökumenn voru stöðvaðir vegna gruns um akstur undir áhrifum fíkniefna. Reyndist annar þeirra hafa trassað að borga tryggingarnar og var því skráningarmerki bílsins tekin af.
Kópavogs- og Breiðholtslögreglan sinnti útkalli í verslun vegna unglinga sem sátu í anddyri verslunarinnar og trufluðu viðskiptavini.
Lögreglunni sem er með stöð á Vínlandsleið, barst tilkynning um unga menn sem voru að dunda sér við að slá golfbolta í átt að bílasölum. Eitthvað tjón varð á bifreiðum eftir golfboltana.
