Prestarnir við Glerárkirkju hafa boðað til sérstaks minningarviðburðar í kirkjunni á morgun, 6. september. Þar verða lesin upphátt nöfn og aldur allra barna sem drepin hafa verið í „þeim manngerðu hamförum“ sem orðið hafa í Palestínu og Ísrael frá 7. október 2023.
Í yfirlýsingu frá prestunum segir að markmiðið sé að skapa helga stund í nafni „friðar-, réttlætis- og kærleiks boðskapar“ sem trú kirkjunnar byggi á. „Við viljum nefna nöfn þeirra og aldur í heilögu rými, gefa stund til að minnast og meðtaka að þetta eru saklausar og elskaðar manneskjur en ekki tölur á blaði. Manneskjur sem við megum aldrei gleyma!“
Þá er vísað til orða Krists sem flutt eru við hverja skírn: „Leyfið börnunum að koma til mín og varnið þeim eigi“. Í tilkynningunni segir að með þeim sé ítrekuð helgi lífsins, að börnin séu heilög, dýrmæt og mikilvæg, sama hvaðan þau komi. Því verði lesin fyrst nöfn og aldur barna sem látist hafi í Ísrael og síðan þeirra sem hafi fallið í umsátrinu um Palestínu, „því að Guð sér hvorki landamæri né þjóðerni, veggi, múra eða gaddavírsgirðingar.“
Fjölbreyttur hópur lesara tekur þátt í athöfninni sem stendur yfir frá klukkan 9:00 til 12:00 og aftur frá 16:00 til 20:00. Gestum er velkomið að líta við í kirkjunni á sínum forsendum, kveikja á kertum, setjast niður í kyrrð og taka þátt í að lyfta upp minningu barnanna sem látist hafa í átökunum.
Samkvæmt opinberum gögnum frá heilbrigðisráðuneyti Palestínu hafa um 18.000 börn verið drepin frá 7. október 2023.
Á morgun fer fram stórfundurinn Þjóð gegn þjóðarmorði en hann fer fram á Akureyri, Ísafirði, Egilstöðum og Reykjavík og hefst klukkan 14:00.
