Nýtt fjárlagafrumvarp ríkisstjórnarinnar fyrir árið 2027, sem kynnt var í dag, mætir harðri andstöðu af hálfu stjórnarandstöðunnar. Diljá Mist Einarsdóttir, alþingismaður Sjálfstæðisflokksins, gagnrýnir fyrirhugaðar skatta- og gjaldahækkanir harðlega í opinberri færslu og segir árangur stjórnvalda hingað til engan.

Í nýja frumvarpinu er boðuð dulin skatthækkun á almenning með því að láta persónuafslátt og skattþrep hækka minna en núgildandi reglur segja til um. Þessi breyting, sem stjórnvöld rökstyðja með vísan til styttri vinnuviku og minni framleiðniaukningar, á að skila ríkissjóði 3,1 milljarði króna í auknar tekjur árið 2027. Auk þess er áformað að hækka bankaskatt um rúmlega 75 prósent.

Gagnrýnir efnahagslegt árangursleysi

Diljá Mist segir jákvætt að stefnt sé að hallalausum fjárlögum fyrir árið 2027, enda sé nauðsynlegt að vinna á þeim hallarekstri sem myndaðist vegna ítrekaðra áfalla undanfarin ár. Hún setur hins vegar stórt spurningarmerki við þá leið sem ríkisstjórnin velur til að ná því markmiði.

„Leiðin sem ríkisstjórnin velur að þeim eru hins vegar skatta- og gjaldahækkanir á fólk og fyrirtæki í landinu. Mér er það til efs að þessar hækkanir muni skila tilætluðum tekjum — það er s.s. ólíklegt að planið gangi eftir,“ ritar Diljá og bætir við að landsmenn séu orðnir vanir því með þessa ríkisstjórn.

Hún sakar stjórnvöld um að skjóta sér undan erfiðum ákvörðunum í ríkisrekstrinum. „Í stað þess að draga úr útgjöldum og minnka ríkisbáknið seilist ríkisstjórnin enn á ný í vasa almennings.“

Að mati Diljár vinna þessar aðgerðir beinlínis gegn því meginmarkmiði sem ríkisstjórnin var kosin til að fylgja eftir. „Þessar aðgerðir eru ekki til þess fallnar að ná niður verðbólgu og þar með vöxtum eins og stjórnin var kosin til að gera. Árangur þeirra hefur enda hingað til verið enginn.“