Matvælastofnun barst tilkynning í gær, miðvikudaginn 6. maí frá Kaldvík ehf. um strok úr eldisstöð þeirra í Lónum í Kelduhverfi, Kópaskeri.

Samkvæmt upplýsingum frá rekstrarleyfishafa varð bilun í búnaði til þess að fiskur komst úr eldiskeri og út í settjörn þar sem seinni vörn gegn stroki er staðsett. Rekstrarleyfishafi virkjaði strax viðbragðsáætlun vegna stroks auk þess að gera ráðstafanir til að koma í veg fyrir frekara strok. Rekstrarleyfishafi telur hverfandi líkur á að eldislax hafi komist úr settjörn og út í sjó.

Matvælastofnun hefur ekki borist fjöldi laxa í kerinu en samkvæmt upplýsingum frá rekstrarleyfishafa var meðalþyngd þeirra 92,6 gr.

Matvælastofnun vinnur að rannsókn málsins og hefur kallað eftir frekari gögnum frá Kaldvík sem gæti varpað skýrara ljósi á atvikið. Matvælastofnun mun gefa út eftirlitsskýrslu vegna atviksins þegar rannsókn er lokið og birta á mælaborði fiskeldis á heimasíðu Matvælastofnunar.