Rauði krossinn verður í viðbragðsstöðu um allt vestanvert land þegar almyrkvi verður á sólu 12. ágúst. Neyðarvarnateymi félagsins og hópur sjálfboðaliða verða sérstaklega til taks á Snæfellsnesi og Vestfjörðum, þar sem búist er við miklum fjölda ferðamanna.
Í tilkynningu frá Rauða krossinum segir að undirbúningur hafi staðið yfir í marga mánuði í samstarfi við aðra viðbragðsaðila. Félagið verður meðal annars með sérútbúnar neyðarvarnakerrur, rúm, teppi og stórt tjald á sunnanverðum Vestfjörðum sem hægt verður að reisa hratt ef þörf krefur.
„Mottó Rauða krossins er að vera tilbúinn að bregðast við ef hættu- eða neyðarástand skapast og fólk þarf af einhverjum ástæðum á stuðningi okkar að halda,“ segir Aðalheiður Jónsdóttir, teymisstjóri neyðarvarna hjá Rauða krossinum.
Hún bendir á að búast megi við mikilli umferð bæði smærri og stærri ökutækja um svæði sem víða séu viðkvæm og utan alfaraleiða. Þá geti veður, aukin flugumferð og fjöldi skemmtiferðaskipa við vesturströndina einnig haft áhrif á aðstæður.
„Ef slys verða eða annars konar áföll henda verður Rauði krossinn tilbúinn til aðstoðar og getur komið upp fjöldahjálparstöð í tjaldinu eða hentugu húsnæði gerist þess þörf,“ segir Aðalheiður.
Rauði krossinn hvetur fólk til að nýta skipulagða áhorfsstaði í heimabyggð sinni þegar kostur er. Um 70 prósent landsmanna munu geta séð almyrkvann frá heimahögum sínum og þurfi því ekki að ferðast langar leiðir.
Jafnframt er fólk hvatt til að undirbúa ferðalög vel, leggja tímanlega af stað og gera ráð fyrir umferðartöfum.
„Við biðlum til þeirra sem ætla að vera á ferðinni að leggja tímanlega af stað og fara að öllu með gát við þessar óvenjulegu aðstæður svo að sem flest geti notið þessa stórkostlega sjónarspils sem almyrkvinn verður,“ segir Aðalheiður.
Rauði krossinn minnir einnig ökumenn á að hafa viðlagakassa í bílnum með meðal annars vatni, nesti, hlýjum fötum, teppi, hleðslubanka fyrir síma og skyndihjálpartösku, auk þess að fylla á bílinn áður en lagt er af stað og gleyma ekki sólmyrkvagleraugunum.
Hér má lesa fimm atriði sem Rauði krossinn bendir fólki á að gera áður en lagt er af stað í ferðalagið.
- Útbúðu viðlagakassa í bílinn. Í hann skaltu t.d. setja vatn, nesti, hreinlætisvörur, teppi, hlý föt, aukaskó, hleðslubanka fyrir símann og skyndihjálpartösku.
- Fylgstu vel með veðurspá og leiðbeiningum frá yfirvöldum, s.s. um umferðartakmarkanir.
- Fylltu á bílinn (eldsneytistankinn eða rafhlöðuna).
- Leggðu tímanlega af stað og ekki flýta þér heim.
- Mundu eftir sólmyrkvagleraugunum!
