Lögreglan á höfuðborgarsvæðinu hafði í nógu að snúast frá klukkan 5 í morgun til 17 síðdegis en alls voru 171 mál skráð í kerfi embættisins á tímabilinu.
Meðal verkefna var tilkynning um eld í heimahúsi sem reyndist eiga upptök sín í potti á eldavél. Slökkvilið mætti á vettvang og sá um reykræstingu.
Þá var ökumaður stöðvaður á Miklubraut eftir að hafa mælst á 140 kílómetra hraða þar sem hámarkshraði er 80 kílómetrar á klukkustund.
Í Reykjavík hafði lögregla afskipti af erlendum aðila sem var sagður róta í rusli íbúa á svæðinu.
Annar ökumaður var stöðvaður vegna gruns um akstur undir áhrifum fíkniefna.
Einnig var tilkynnt um reiðhjólaslys í Hafnarfirði. Sá sem slasaðist var fluttur á slysadeild til skoðunar.
Lögreglu bárust jafnframt tilkynningar um grunsamlegar mannaferðir í hverfi 109 og heimilisófrið í Árbænum. Þar var einstaklingur handtekinn og færður í fangaklefa.
