Gjaldþrot upp á 227 milljóna króna varð hjá eigendum TGI Fridays og Grillhússins, en kröfuhafar fengu ekki neitt upp í lýstar kröfur, en eigið fé var neikvætt samkvæmt síðasta ársreikningi, eins og VB greindi fyrst frá.
Samkvæmt lögbirtingablaðinu lýstu kröfuhafar 228 milljónum króna í þrotabúið en ekkert fékkst upp í þær kröfur.
Eigendur Tanksins voru þeir Jóhannes Birgir Skúlason og Helgi Magnús Hermannsson.
Veitingastöðunum hefur enn ekki verið lokað, og ekki ólíklegt að rekstrinum hafi verið haldið áfram undir öðru félagi.
Tankurinn tók við eignarhaldi Grillhússins ehf. um miðjan apríl á síðasta ári og þá urðu Jóhannes og Helgi nýir stjórnendur veitingastaða Grillhússins á Sprengisandi og Laugavegi 96.
Samkvæmt síðasta ársreikningi Tanksins ehf. nam tap félagsins 14,2 milljónum króna árið 2023, samanborið við tap upp á 18,1 milljón króna árið áður.
Handbært fé félagsins í árslok 2023 var 25,4 milljónir króna, voru eignir bókfærðar á 76 milljónir, en eigið fé félagsins var neikvætt um 62,1 milljón og námu skuldir 138 milljónum.
Hjá Grillhúsinu var taprekstur á árunum 2019-2022, en mörg árin þar á undan hafði félagið skilað hagnaði.
Eignir félagsins voru bókfærðar á 115 milljónir í árslok 2022, skuldir námu 150 milljónum en þar af voru 47 milljónir í langtímaskuldir. Eigið fé var neikvætt um 35 milljónir.
