Gamalt myndband hefur heldur betur farið á flug á TikTok en þar má sjá atriði úr uppsetningu MR-inga á leikritinu High School Musical. Þar fer Snorri Másson á kostum í hlutverki fordómafulls einstaklings.

Leikritið var sett upp af leikfélaginu Frúardagur í MR árið 2016 en leikstjórar voru þeir Jóhann Kristófer Stefánsson og Sigurbjartur Sturla Atlason og var sýningin afar vinsæl á sínum tíma.

Manneskjan sem birtir myndbrotið segir leikritið hafa verið fyrirboði en Snorri hefur undanfarið ýft ansi margar fjaðrir í samfélaginu en á dögunum gagnrýndi hann hversu algengur regnbogafáninn er í grunn- og leikskólum landsins.

Snorri varði málstað sinn í viðtali á Vísi fyrir stuttu þar sem hann gagnrýndi öfgafull viðbrögð fólks við orðum hans. Sagði hann að öllum sé frjálst að beita ýmsum táknum í sínu daglegu lífi sínu.

„En mínar athugasemdir lutu að áliti ráðherrans á slíku í opinberum skólum og leikskólum. Það kemur mér á óvart að slíkar spurningar teljist sæta tíðindum frá mér þar sem ég hef áður lýst opinberlega áhyggjum mínum af því hvort menn séu að gæta nægilega vel að ábyrgð sinni innan menntakerfis þegar verið er að kynna nýstárlegar og síbreytilegar hugmyndir, til dæmis Samtakanna 78, um trans- og kynsegin mál fyrir börnum sem eru enn að læra að greina á milli ímyndunar og veruleika.  Að hluta til vísar fáninn til slíkra hugmynda. Að hvetja til ábyrgrar nálgunar í sátt við foreldra á þessu sviði fer vel saman við að sýna fólki að öðru leyti virðingu óháð því hvernig það lifir sínu lífi.“

Hér fyrir neðan má sjá stórleik Snorra en tæplega 16.000 manns hefur séð myndskeiðið á tæpum sólarhring.