Landsbankinn segir ýmislegt benda til þess að komur erlendra ferðamanna hingað til lands hafi verið vantaldar og að utanlandsferðir Íslendinga hafi verið oftaldar.
Hagfræðideild Landsbankans segir heildarmyndina á Íslandi vera þá að ferðaþjónusta hafi vaxið fyrstu fimm mánuði ársins.
Hagfræðideild Landsbankans segir líklegt að ferðamenn hafi verið fleiri á fyrri hluta ársins en það sem talning Ferðamálastofu gefur til kynna, eða þá að talningin í fyrra hafi hreinlega verið ofmetin.
Kemur einnig fram að ferðir Íslendinga gætu verið oftaldar, eins og segir í nýrri hagsjá Landsbankans.
Færri ferðamenn hafa sótt Ísland heim það sem af er þessu ári. Á sama tíma í fyrra, sé tekið mið af tölum Ferðamálastofu, eða 721 þúsund á fyrstu fimm mánuðum ársins borið saman við 750 þúsund á sama tíma í fyrra. En þrátt fyrir það hefur erlend kortavelta aukist sem og útflutningstekjur af ferðaþjónustu:
„Við teljum ýmislegt benda til þess að erlendir ferðamenn hafi verið fleiri síðustu mánuði en talning Ferðamálastofu segir til um,“ segir í tilkynningu frá hagfræðideild Landsbankans.
Bent er á að við mat á fjölda erlendra ferðamanna er heimsækja Ísland byggir Ferðamálastofa á gögnum Isavia um heildarfarþegafjölda um Keflavíkurflugvöll en einnig á eigin mati á skiptingu farþega eftir þjóðernum, en mat á þjóðerni byggir á úrtakskönnunum sem eru gerðar reglulega yfir mánuðinn.
Landsbankinn segir að þar til nýverið hafi aðferðin reynst vel og tölur um fjölda ferðamanna hafi þróast með svipuðum hætti og aðrir mælikvarðar. Því virst nokkuð réttar en annað virðist vera uppi á teningnum núna.
Segir að umferð um Keflavíkurflugvöll hafi ekki verið meiri frá árinu 2018, og talning vegagerðarinnar sýnir að umferð um þjóðvegi landsins hafi aukist talsvert í öllum landshlutum nema á Suðurlandi á fyrstu mánuðum ársins:
„Í ljósi þess að Íslendingar ferðast til útlanda sem aldrei fyrr er hálfólíklegt að þeir standi einnig fyrir fjölgun gistinótta og aukinni umferð hérlendis. Þessir mælikvarðar eru í takt við aukna erlenda kortaveltu og vöxt í útflutningstekjum samkvæmt þjóðhagsreikningum. Því má telja líklegast að ferðamenn hafi verið fleiri á fyrri hluta ársins en talning Ferðamálastofu gefur til kynna, eða þá að í fyrra hafi þeir verið færri en talningin gaf til kynna.“
Telur hagfræðideildin að ferðir Íslendinga út í hinn stóra heim séu líklega oftaldar.
Tæplega 70 þúsund Íslendingar fóru til útlanda í maí samkvæmt tölum frá Isavia og samkvæmt þeim fjölgaði ferðum Íslendinga í maí um 25 prósent á milli ára. Hafa utanlandsferðir Íslendinga aldrei verið fleiri í maímánuði.
Met var einnig sett í apríl en þá slógu Íslendingar met í fjölda utanlandsferða í einum mánuði. Það sem af er þessu ári hafa utanlandsferðir Íslendinga verið um 29 prósent fleiri en á sama tíma í fyrra:
„Þótt við teljum ekki ólíklegt að ferðum Íslendinga hafi fjölgað í takt við stóraukna kortaveltu Íslendinga erlendis, kann fjölgunin að vera minni en tölurnar gefa til kynna.“
