Ragnhildur Sverrisdóttir, upplýsingafulltrúi Landsvirkjunar, segir að regnbogafáninn sé og verði tákn hinsegin fólks og gagnrýnir þá sem vilji skilgreina hann sem almennt tákn fjölbreytileika og kærleika án tengingar við réttindabaráttu hinsegin fólks.
Í Facebook-færslu, sem hún skrifar í kjölfar þess að málað var yfir regnbogann á tröppum Grafarvogskirkju, segir hún umræðuna hafa tekið nýja stefnu þar sem ekki aðeins andstæðingar hinseginréttinda heldur einnig vel meinandi stuðningsfólk grafi undan merkingu fánans.
„Eftir að málað var yfir regnbogann á tröppum Grafarvogskirkju hefur umræðan enn og aftur blossað upp. Hinir fordómafullu eru auðvitað fremstir í flokki, en því miður verður sífellt algengara að sjá „jákvæðar“ athugasemdir, settar fram að því er virðist í kærleika og af alvöru, sem gera þó ekkert annað en að grafa undan stuðningi við okkur,“ skrifar Ragnhildur.
Hún gagnrýnir sérstaklega þá sem telja að regnbogafáninn eigi fyrst og fremst að standa fyrir almenn gildi á borð við virðingu, umburðarlyndi og kærleika, óháð hinseginbaráttunni.
„Svo almenningur mætti temja sér að tala bara um regnbogafána og halda hinseginleikanum þar víðs fjarri? Grípa bara fána hinsegin fólks og lýsa því yfir að hann sé táknmynd „regnbogasamtaka fjölbreytileika“? Fólk ætti að fylkja sér undir þann fallega fána af því að í huga þess hefur hann ekkert með hinseginleika að gera, heldur er tákn virðingar, fjölbreytileika og kærleika?“ spyr hún.
Ragnhildur segir slíka nálgun jafngilda því að taka tákn minnihlutahóps og svipta það upprunalegri merkingu sinni.
Í lok færslunnar segir hún að regnbogafáninn hafi verið hannaður sem tákn hinsegin fólks og að enginn eigi rétt á að endurskilgreina hann.
„Það liggur við að ég vilji frekar ómengaða andstöðu en svona samstöðu. Regnbogafáninn er fáni hinsegin fólks og beinlínis gerður til að gegna því hlutverki. Kannski er erfitt fyrir einhvern að sjá hann blakta við hún en það gefur engum leyfi til að stela honum fyrir annan málstað, jafnvel þótt sá málstaður sé fagur. Hinseginleikinn er kannski óþægilegur en hann er staðreynd og verður ekki þurrkaður út.“
