Lögreglan á höfuðborgarsvæðinu sinnti fjölbreyttum verkefnum í gærkvöldi og nótt og voru alls 56 mál skráð í kerfi embættisins.

Meðal verkefna var að rætt var við ökumann sem fannst sofandi í ökutæki sínu á stórum gatnamótum. Grunur vaknaði um að maðurinn væri undir áhrifum fíkniefna. Við leit í ökutækinu fundust meint fíkniefni auk vopns.

Þá hafði lögregla ítrekað afskipti af skjólstæðingi í félagslegu búsetuúrræði eftir að tilkynningar bárust um öskur, hótanir og ónæði af hans hálfu yfir daginn. Maðurinn fékk ítrekuð tækifæri til að bæta hegðun sína en þegar leið á daginn skemmdi hann innanstokksmuni á staðnum og þótti ekki hæfur til dvalar meðal almennings. Hann var því vistaður í fangaklefa.

Einnig var ökumaður stöðvaður í umferðareftirliti sem reyndist vera ölvaður, undir áhrifum fíkniefna og sviptur ökuréttindum. Við nánari athugun kom jafnframt í ljós að maðurinn var í brottvísunarferli. Honum var kynnt ákvörðun um brottvísun á lögreglustöð áður en honum var sleppt að lokinni blóðsýnatöku.

Lögregla sinnti auk þess fjölda annarra verkefna á tímabilinu.