Hótel Hjarðarból stefnir að umfangsmikilli uppbyggingu ferðaþjónustu á jörðinni Hjarðarbóli í Ölfus og leita eigendur nú að meðfjárfestum og samstarfsaðilum fyrir verkefnið.

Áformin fela meðal annars í sér byggingu nýs hótels og frekari uppbyggingu á svæðinu milli Hveragerði og Selfoss, þar sem lögð verður áhersla á sjálfbærni og vistvænar lausnir.

Hótelið er rekið af hjónunum Sigríði Helgu Sveinsdóttur og Guðbrandi Sigurðssonar, sem segja eftirspurn eftir vistvænni gistingu hafa aukist verulega undanfarin ár.

„Við höfum séð mikla breytingu á ferðaþjónustunni undanfarin ár þar sem sífellt fleiri ferðamenn sækja í rólegra umhverfi og nálægð við náttúruna, utan stærstu þéttbýliskjarna landsins,“ segir Guðbrandur.

Samkvæmt áformunum verður meðal annars horft til lausna tengdum vindorku, nýtingu heits vatns og uppbyggingu hleðslustöðva fyrir ferðamenn.

Eigendurnir segja sjálfbærni verða lykilþátt í allri uppbyggingu verkefnisins.

„Við viljum halda áfram að þróa Hjarðarból með ábyrgum hætti og sjáum mikil tækifæri í sjálfbærri ferðaþjónustu á svæðinu. Hugmyndirnar hafa þegar verið teiknaðar upp og nú leitum við að aðilum sem hafa áhuga á að koma að verkefninu með okkur,“ segir Sigríður.

Á jörðinni er einkavatnsveita sem hjónin byggðu sjálf upp fyrir starfsemina og segja þau mikilvægt að halda vel utan um innviði á svæðinu.

„Við höfum alltaf lagt áherslu á að vanda til verka og byggja upp starfsemi sem fellur vel að umhverfinu. Það skiptir okkur miklu máli að þeir gestir sem hingað koma upplifi bæði góða þjónustu og þá náttúru sem svæðið hefur upp á að bjóða,“ segir Guðbrandur.

Fram kemur að Hótel Hjarðarból hafi frá upphafi tekið á móti ferðamönnum af fjölmörgum þjóðernum auk skólahópa og annarra ferðahópa sem sækja í gistingu nærri helstu ferðamannastöðum Suðurlands.

Eigendurnir segja staðsetningu Hjarðarbóls hafa reynst afar vel, bæði vegna nálægðar við þjónustu og þeirrar kyrrðar sem svæðið býður upp á.