Knattspyrnudeild Gróttu hefur sent frá sér yfirlýsingu þar sem framkoma hluta stuðningsmanna Fylkis í leik liðanna í átta liða úrslitum Mjólkurbikars karla síðastliðinn föstudag er harðlega gagnrýnd.
Leikurinn fór fram 13. júní á heimavelli Fylkis og lauk með sigri Árbæinga eftir framlengingu í afar spennandi viðureign. Í tilkynningu Gróttu er jafnframt tekið fram að umgjörð leiksins af hálfu Fylkis hafi verið til fyrirmyndar og félaginu óskað áframhaldandi velgengni í bikarkeppninni.
Þrátt fyrir það segir Grótta að hópur stuðningsmanna Fylkis hafi ítrekað veist að leikmanni liðsins og aðstandendum hans með grófum og óviðurkvæmilegum ummælum á meðan leik stóð yfir. Samkvæmt tilkynningunni voru meðal annars látnar falla kynferðislegar athugasemdir sem beindust að fjölskyldumeðlimum leikmannsins.
Þá segir jafnframt að unnusta leikmannsins hafi orðið fyrir aðkasti frá stuðningsmönnum á leiknum og síðar í verslun í nágrenni vallarins, löngu eftir að leiknum lauk.
Atvikið vakti einnig athygli í beinni útsendingu RÚV frá leiknum. Undir lok fyrri hálfleiks gerði lýsandi leiksins athugasemd við hegðun stuðningsmanna og sagði meðal annars að menn yrðu að sýna háttvísi og að Fylkismenn ættu að bregðast við þegar notuð væru ljót orð og óviðeigandi ummæli.
Stjórn knattspyrnudeildar Gróttu segir að slíkar árásir á leikmenn og fjölskyldur þeirra eigi ekkert erindi í íslenska knattspyrnu. Félagið fordæmir hegðun umrædds hóps stuðningsmanna og kveðst vænta þess að málið verði tekið til skoðunar.
