Hin goðsagnakennda súperdós frá Coca-Cola er komin aftur á markað í takmörkuðu upplagi og verður fáanleg bæði sem venjulegt Coca-Cola og Coca-Cola Zero Sugar. Endurkoman kemur í sérstökum HM-umbúðum í tilefni heimsmeistaramótsins í knattspyrnu og hefur þegar vakið mikla athygli meðal neytenda.

Súperdósin kom fyrst á markað hér á landi í kringum árið 1990 og varð fljótt órjúfanlegur hluti af íslenskri gosmenningu en hún var tekin af markaði árið 2017. Í henni eru 500 millilítrar af gosi.

Að sögn Coca-Cola Europacific Partners hefur eftirspurn eftir endurkomu súperdósarinnar verið mikil undanfarin ár. Fjöldi fyrirspurna frá bæði neytendum og viðskiptavinum hafi orðið til þess að ákveðið var að færa þessa vinsælu umbúðastærð aftur í hillur verslana.