Sænsk yfirvöld hafa ásakað mann, sem var handtekinn um helgina, um njósnir fyrir hönd Kína um meðlimi úr minnihlutahópi Úígúra.
Á réttarfundi í Solna, norðan við Stokkhólm, síðar í dag mun saksóknari krefjast þess að maðurinn verði úrskurðaður í gæsluvarðhald vegna alvarlegra njósna.
„Maðurinn er grunaður um að hafa ólöglega safnað upplýsingum og gögnum um fólk úr Úígúra samfélaginu fyrir kínversku leyniþjónustuna,“ sagði saksóknarinn Mats Ljungqvist. „Málið er mjög viðkvæmt og á frumstigi rannsóknar. Því get ég ekki veitt frekari upplýsingar að svo stöddu,“ bætti hann við í yfirlýsingu.
Sá grunaði var handtekinn á sunnudag samkvæmt dómsskjölum sem AFP aflaði, en þar kemur fram að hann sé fæddur 8. apríl 1967 og hafi þurft túlk í mandarín. Hann er sakaður um að hafa stundað njósnir um flóttamenn eða ólöglega öflun upplýsinga um einstaklinga, samkvæmt yfirlýsingunni.
„Þessi tegund njósna er oft framkvæmd af valdníðandi eða ólýðræðisríkjum,“ sagði enn fremur í yfirlýsingunni.
Úígúrar eru fjölmennasti þjóðernishópurinn í Xinjiang-héraði í norðvesturhluta Kína og eru súnní múslimar.
Kínversk stjórnvöld hafa verið sökuð um að hafa fangelsað meira en milljón Úígúra sem hluta af herferð sem Sameinuðu þjóðirnar hafa sagt að gæti talist „glæpir gegn mannkyninu“. Kína neitar ásökunum og segir aðgerðir sínar hafa útrýmt öfgahyggju í Xinjiang og stuðlað að efnahagsþróun.
