Bifreið valt við Hringbraut í Reykjavík um kortér yfir átta í morgun og urðu talsverðar umferðartafir af þeim völdum. Ökumanninum, sem var einn í bílnum, varð ekki meint af en hann komst af sjálfsdáðum úr honum.
Í samtali við Mannlíf, segir bílstjórinn, Kristján Jónsson, að óhappið hafi orðið þegar annar bílstjóri „svínaði“ fyrir hann.
„Ég er að keyra á þriggja akreina braut, lengst til vinstri og það kemur bara einn gæi og keyrir inn í mig. Eða bara svínar fyrir mig skilurðu? Og hann slædar mig þarna yfir.“
Eins og áður hefur komið fram komst Kristján út úr bílnum að sjálfsdáðum en fyrsta sem hann sá þegar hann skreið upp úr bílnum gladdi hann.
„Það fyrsta sem ég sá þegar ég skríð út úr bílnum er að það er sjúkrabíll bara mættur. Ég var svo heppinn að þeir voru á ferðinni. Það var algjör tilviljun.“
Aðspurður hvort bíllinn sé mikið skemmdur kveðst Kristján ekki vita það.
„Ég veit það ekki, hef ekkert séð bílinn, ég var bara að koma af spítalanum. Það eru einhverjar rúður brotnar og svona.“
Þó að Kristján hafi sloppið vel var honum töluvert brugðið við veltuna.
„Jú, þetta er svaka adrenalínsjokk sem maður fær í svona náttúrulega.“
Einkanúmerið á bíl Kristjáns er Ó BOY, en aðspurður hvort hann sjái einhvern húmor í þeirri staðreynd, svona í ljósi óhappsins, segir Kristján svo ekki vera, ekki þannig.
„Nei, ekki þannig lagað séð. Ég er búinn að vera með þetta einkanúmer nokkuð lengi. Þetta er skemmtilegt númer, það vekur athygli hjá unga fólkinu, það er svolítið gaman að því.“
