Ugla Stefanía Kristjönudóttir Jónsdóttir gagnrýnir harðlega þá sem máluðu yfir regnbogafána á eign kirkjunnar og segir um að ræða augljós skemmdarverk, óháð því hvaða skoðanir fólk hafi á fánanum sjálfum.

Í Facebook-færslu bendir hún á „virkir í athugasemdum“ reyni að réttlæta verknaðinn með því að segjast styðja íslenska fánann eða vera andvígir sýnileika regnbogafánans.

„Það skiptir samt engu máli hvað fólki finnst um tiltekna fána – hér hafa einstaklingar farið í skjóli nætur í óþökk kirkjunnar, og málað yfir verk sem kirkjan lét gera og lagði vinnu í. Það er því óneitanlega verið að fremja skemmdarverk á eign kirkjunnar,“ skrifar hún.

Ugla Stefanía segir jafnframt að með gjörningnum sé íslenski fáninn notaður sem tæki til ólögmæts athæfis.

„Hér er því verið að nota íslenska fánann til glæpsamlegs athæfis, sem er auðvitað ekkert nema vanvirðing við íslenska fánann og mögulega brot á fánalögum.“

Að hennar mati þjónar slíkt athæfi engum tilgangi nema að auka á sundrungu í samfélaginu.

„Svona gjörningur er engum til framdráttar, og ýtir bara undir sundrungu og hvetur til frekari skemmdarverka.“

Hún segir að lokum að þeir sem beri virðingu fyrir íslenska fánanum ættu ekki að fagna slíkum verknaði.

„Því ætti enginn sem elskar íslenska fánann að fagna.“