Víðáttumikið svæði þakið hvítum marmaraúrgangi í Indlandi hefur á undanförnum árum orðið að óvenjulegum ferðamannastað. Landslagið minnir fremur á snævi þakinn fjalladal en iðnaðarsvæði þar sem úrgangi er fargað.
Svæðið er í Kishangarh í Rajasthan-ríki í norðvesturhluta Indlands, en borgin er ein helsta miðstöð marmaravinnslu landsins. Við skurð og slípun marmara og graníts verður til mikið magn af hvítri leðju og steinúrgangi sem safnast hefur upp á svæðinu.
Urðunarsvæðið nær yfir um 33 hektara og þangað berast daglega meira en 5.500 tonn af úrgangi frá yfir 1.200 vinnslustöðvum. Er það talið eitt stærsta urðunarsvæði sinnar tegundar í Asíu.
Þrátt fyrir iðnaðaruppruna svæðisins hefur það orðið vinsæll áfangastaður ferðamanna, kvikmyndagerðarfólks og áhrifavalda. Pör sækja þangað í myndatökur fyrir brúðkaup og landslagið hefur jafnframt verið notað við gerð kvikmynda og tónlistarmyndbanda. Þá er boðið upp á hestaferðir um hvítar hæðirnar.
Vinsældir staðarins hafa aukist mikið með samfélagsmiðlum, þar sem landslaginu er gjarnan líkt við snævi þakta Alpana. Eftir úrkomu safnast vatn í dældir milli úrgangshauganna og myndar bláar tjarnir sem gera ásýndina enn óvenjulegri.
Fegurð svæðisins leynir þó á umhverfisvandamálum. Yfirvöld hafa ítrekað varað við áhrifum marmaraúrgangsins, meðal annars vegna ryks og hættu á mengun grunnvatns. Rannsóknir hafa sýnt aukið magn salts og tiltekinna þungmálma í vatni í nágrenninu.
Æðsti umhverfisdómstóll Indlands fyrirskipaði í janúar að gripið yrði til úrbóta og hvatti meðal annars til aukinnar endurnýtingar marmaraleðjunnar. Dómstóllinn gagnrýndi jafnframt skort á mengunarvörnum og eftirliti á svæðinu.
Umhverfisáhættan virðist þó enn sem komið er ekki hafa dregið úr áhuga ferðamanna.
