Valgarð Már Jakobsson, fyrrverandi skólameistari og kennari, er látinn, 54 ára að aldri. Hann lést 31. janúar síðastliðinn. Greint var frá andláti hans á vef Kvennaskólans.
Valgarð starfaði við Framhaldsskólann í Mosfellsbæ frá stofnun skólans árið 2009 og allt til ársins 2025. Á þeim tíma gegndi hann meðal annars starfi skólameistara og lagði sitt af mörkum til uppbyggingar og þróunar skólans.
Hann tók einnig virkan þátt í samfélagsmálum í Mosfellsbæ og starfaði sem varaformaður fræðslunefndar bæjarins auk þess að vera varamaður í skipulagsnefnd á árunum 2018 til 2022.
Áður en Valgarð hóf störf við Framhaldsskólann í Mosfellsbæ starfaði hann meðal annars hjá Mími. Þá starfaði hann einnig sem húsasmiður á fyrri starfsferli sínum.
Valgarð lauk B.Sc.-prófi í líffræði frá Háskóla Íslands árið 1992. Árið 2009 lauk hann jafnframt M.Ed.-prófi í stærðfræði og kennslufræði frá Háskólanum í Reykjavík.
Samkvæmt upplýsingum á vef Kvennaskólans hafði Valgarð á síðasta ári ákveðið að snúa sér aftur að kennslu, sem hafði átt hug hans allan.
