Verð á enska boltanum hjá Sýn verður kynnt í júlí samkvæmt starfsmanni áskriftardeildar fyrirtæksins.
Mikil umræða hefur ríkt í samfélagi knattspyrnuáhugamanna undanfarna mánuði af hverju ekki væri búið að kynna mögulegar áskriftarleiðir til að horfa á enska boltann en Sýn tryggði sér sýningarréttinn í júní 2024 og er því heilt ár liðið án þess að fyrirtækið hafi gefið upp verð. Það mun hins vegar breytast í júlí en starfsmönnum fyrirtæksins var greint frá þessu á fundi í síðustu viku.
Samkvæmt heimildum fjölmiðla mun Sýn borga í kringum fjóra milljarða fyrir sýningarréttinn næstu fjögur ár.
Sýningarrétturinn hefur undanfarin sex ár verið hjá Sjónvarpi Símans en María Björk Einarsdóttir, forstjóri Símans, telur verið á sýningarréttinum of hátt. „Að okkar mati eru jákvæðu rekstrarlegu áhrifin af enska boltanum ofmetin. Enski boltinn styður vissulega við fjarskiptasölu, en ekki nógu mikið til að svara kostnaði að okkar mati. Til að mynda fjölgaði internettengingum hjá Símanum einungis um 1.200 fyrsta árið eftir að við fengum réttinn árið 2019. Við höfum skoðað gögnin yfir þessi sex ár sem við höfum haft sýningarréttinn og metum það sem svo að án hans séu nettó áhrif á rekstrarhagnað og sjóðstreymi jákvæð. Verðið á sýningarréttinum er einfaldlega orðið það hátt,“ sagði María Björk við mbl.is fyrr á þessu ári.
Herdís Dröfn Fjeldsted, forstjóri Sýnar, hefur ekki svarað fyrirspurnum Mannlífs um ýmsa hluti, meðal annars enska boltann, þrátt fyrir að fyrirtækið hafi sérstaklega óskað eftir fyrirspurnum í kjölfar þess að nafni Stöðvar 2 var breytt í Sýn í síðustu viku og mikil óvissa hefur ríkt í kringum fyrirtækið undanfarna mánuði.
