Glæsilegt og nýlegt einbýlishús við Döllugötu 10 á Reynisvatnsási í Reykjavík hefur verið sett á sölu fyrir 275 milljónir króna.
Húsið var byggt árið 2021 og er skráð alls 335 fermetrar að stærð, auk 45,6 fermetra óráðstafaðs rýmis sem nýtt er sem geymsla.
Eignin er á tveimur hæðum og hentar vel fyrir stóra fjölskyldu eða þá sem vilja hafa tekjumöguleika af útleigu. Á efri hæðinni, sem er 166 fermetrar, eru fjögur svefnherbergi, tvö baðherbergi og rúmgóð sameiginleg rými. Miklar áherslur hafa verið lagðar á hönnun og frágang, meðal annars með hljóðdúk eða hljóðplötum í flestum vistarrýmum auk innfelldrar og óbeinnar lýsingar í loftum.
Á jarðhæð hússins eru tvær aukaíbúðir. Annars vegar er um að ræða 59,3 fermetra tveggja herbergja íbúð með sérinngangi og hins vegar 30,6 fermetra stúdíóíbúð sem er bæði innangeng og með sérinngangi.
Við húsið er einnig 61,2 fermetra bílskúr sem tengist húsinu innan frá. Þá njóta íbúar stórra þaksvala og góðrar útiaðstöðu í rólegu og fjölskylduvænu hverfi á Reynisvatnsási.
Samkvæmt fasteignaauglýsingu er eignin einstaklega vel skipulögð og býður upp á fjölbreytta nýtingarmöguleika, hvort sem er fyrir stórfjölskyldu eða eigendur sem vilja nýta hluta eignarinnar til útleigu.
