Sigmundur gefur lítið fyrir skýringar Birgis: „Við erum ekki að fara að elta hann út í þetta fen.“

Sig­mundur Davíð Gunn­laugs­son, for­maður Mið­flokks­ins, segir skýr­ingu Birgis Þór­ar­ins­sonar um að lið­hlaup hans úr þing­flokki Mið­flokks­ins megi rekja til Klaust­ur­máls­ins „þriggja ára gamla eft­irá­skýr­ingu sem haldi ekki alveg vatni.“

Sig­mundur er ekki einn um þá skoðun, enda hafa ýmsir, bæði úr þing­heimi og utan hans, talið það hæpið að ætla að skella skuld­inni á Klaust­ur­málið, eftir að hafa í heil þrjú ár eftir það setið sem fast­ast í flokknum.

Sig­mundur segir að á þessum þremur árum sem liðin séu hafi Birgi verið treyst fyrir hinum ýmsu hlut­verkum innan flokks­ins. Eftir fund stjórnar Mið­flokks­ins í gær sagði Sig­mundur í sam­tali við mbl.is að vista­skipti Birgis væru von­brigði.

Hann telur þó ákvörðun Birgis fyrst og fremst ranga gagn­vart því fólki sem unnið hafi hörðum höndum að því að koma honum á þing í Suð­ur­kjör­dæmi. Það hafi tek­ist með átta atkvæðum.

Sig­mundur segir ákvörð­un­ina vissu­lega hafa komið á óvart. Hann hafi þó verið var­aður við því af fleirum en einum að Birgir myndi fara í bólið með Sjálf­stæð­is­flokknum.

Sig­mundur seg­ist hafa neitað að trúa því. Birgir hafi heitið því við fólkið í kjör­dæm­inu að hann yrði með Mið­flokknum og hafi auk þess lagt mikið á sig til að vera val­inn odd­viti í kjör­dæm­inu.

Sig­mundur vísar því á bug að lyk­il­menn flokks­ins hafi reynt að sjá til þess að Birgir hlyti ekki odd­vita­sæti, eins og Birgir hefur haldið fram. Sig­mundur segir að fyrrum stjórn­ar­manni flokks­ins hafi ekki þótt upp­still­ing í Suð­ur­kjör­dæmi sam­ræm­ast lögum flokks­ins, en sá hafi hins­vegar engu að síður sagst ætla að sætta sig við nið­ur­stöð­una. Þarna hafi við­kom­andi ein­göngu ítrekað athuga­semd um að valið hefði ekki farið fram á réttan hátt, en þrátt fyrir það ætti nið­ur­staðan að standa.

Birgir hefur gefið það út að hann myndi gjarnan vilja að Sig­mundur og Bergþór Ólason, þeir tveir Mið­flokks­þing­menn sem eftir eru, komi með sér yfir í Sjálf­stæð­is­flokk­inn.

Það kemur Sigmundi afar spánskt fyrir sjónir. Hann segir áhuga­vert að þing­mað­ur­inn sem hafi talið sig nauð­beygðan til að yfir­gefa þing­flokk­inn vilji nú fá hina tvo þing­menn flokks­ins með sér.

„En við erum ekki að fara að elta hann út í þetta fen,“ segir Sig­mundur.