„Þið eruð siðblind helvíti og farið beint þangað. Ég mun finna á endanum hvar þið eigið heima. Hugsaðu um fjölskylduna þína áður en þið haldið áfram. Ég vill ekki beita vopnum en þið gefið mér ekki færi á öðru.“ Þessu greinir Gunnar Smári Egilsson, meðlimur Sósíalistaflokks Íslands frá á Facebook-síðu Sósíalistaflokksins, en hann fékk þessi skilaboð send fyrri tveimur dögum síðan.
Gunnar Smári segir að hann hafi tilkynnt viðkomandi að þessar hótanir yrðu tilkynntar lögreglu, sem hann svo gerði. Þegar lögregla heyrði í Gunnari hafi hann sömuleiðis tilkynnt hótanir sem hann hefur fengið frá öðrum manni sem einnig hefur veist að Gunnari út á götu ásamt fjölskyldu hans.
„Ég sá hann síðast fyrir utan heimili mitt þar sem hélt hótunum sínum áfram, hrópaði alls kyns ókvæðisorð um meinta glæpi sósíalismans, sagði mér að láta Bjarna Benediktsson í friði og hrópaði að lokum: Viva Bjarni Ben!“
Gunnar segist hafa bent lögreglumanni á að deild lögreglu sem rannsakar hatursorðræðu ætti að kanna hvernig áhrifafólk í samfélaginu talar um sósíalisma, en sumir tali um sósíalisma og leggi þar að jöfnu sósíalíska verkalýðsbaráttu Sósíalistaflokksins við morð og ofbeldisverk alræðisstjórna, kennda við sósíalisma, á síðustu öld.
„Að þau sem vildu há róttæka verkalýðsbaráttu á Íslandi í dag væru í raun að leggja af stað í leiðangur sem hlyti að enda í afnámi lýðréttinda, morðum á pólitískum andstæðingum, jafnvel hungursneyðum sem myndu fella tugi milljóna manna. Undir slíkum hatursræðum gegn frelsisbaráttu hinna fátæku og valdalausu fengju vanstilltir menn þær grillur í hausinn að sjálfsagt væri að hóta og jafnvel meiða forystufólk í Sósíalistaflokknum og í verkalýðshreyfingunni.
Ég stakk upp á að lögreglan gæti t.d. haldið erindi í stjórnmálaskóla Sjálfstæðisflokksins, þar sem það hefur verið kennt lengi að sá sem aðhyllist hugsjónir sósíalismans myndi á endanum leiðast út í samskonar alræði og einræðisherrar sovéska og kínverska kommúnistaflokksins.“
Ráðist á húsnæði sósíalista
Síðan í gær hafi óprúttinn aðili eða aðilar grýtt félagsmiðstöð Vorstjörnunnar þar sem Sósíalistaflokkurinn leigir aðstöðu ásamt öðrum samtökum.
„Tveir gluggar voru brotnir þar sem merki flokksins og Samstöðvarinnar eru.
Auðvitað veit ég ekki hvort annar mannanna sem ég benti lögreglunni á hafi verið að verki. En auðvitað grunar mig það. Ég hef verið blaðamaður frá því fyrir næstum fjörutíu árum og oft verið hótað. Menn hafa ruðst inn á ritstjórnir blaða sem ég hef unnið á og gert sig breiða, ætt inn á skrifstofu mína, lokað á eftir sér og hótað líkamsmeiðingum. Ég hef fengið hótanir í pósti, símtölum, tölvupósti og sms. Mér datt aldrei í hug að tilkynna þessar hótanir og hef aldrei sagt frá þeim opinberlega.
Ekki fyrr en núna í vikunni. Heiftin í þessum mönnum og talsmáti, og fullvissa þeirra um að sósíalistar sé skepnur og svívirðingar, veldur því að ég óttast að þetta sé ekki bara belgingur, eins og hótanir eru oftast.“
Sambærileg orðræða viðhöfð gagnvart Sólveigu
Gunnar minnir eins á átökin sem hafi átt sér stað í kringum Eflingu nýverið. Þá hafi sambærileg orðræða verið viðhöfð og Sólveig Anna Jónsdóttir, formaður Eflingar, kölluð Stalínisti, sögð halda dauðalista, þola ekki gagnrýni sem og annað sem hafi átt að skapa hugrenningatengsl milli Sólveigar og alræðisstjórna Sovétríkjanna.
„Og þegar Pútín sendi rússneska herinn inn í Úkraínu stigu menn á stökk, sem af einhverjum óskiljanlegum ástæðum eru taldir málsmetandi, til að lýsa yfir ábyrgð íslenska sósíalista á þessari innrás. Jafnvel þótt Sjálfstæðisflokkurinn hafi verið í pólitísku samstarfi við Sameinað Rússland fram að innrásinni á Krím og Pútín er álíka langt frá því að vera Sósíalisti og Bolsonaro, Trump eða Erdogan, svo einhverjir af öðrum pólitískum samherjum Sjálfstæðisflokksins séu nefndir.“
Gunnar Smári telur að sósíalistar hér á landi þurfi að taka orðræðuna alvarlega sem nú vaði upp hér á landi. Algengt sé að sósíalistar séu sakaðir um að vilja alræðisstjórn.
„Þótt þetta sé banal orðræða þá virkar hún á fólk sem er einmitt banalt fyrir og það sér sósíalista sem stórhættulegt fólk sem verður að stoppa.“
Athugasemdir