Brynjar Níelsson dritar á menn og málefni í nýjustu færslu sinni á Facebook, líkt og fyrri daginn en þar kallar hann meðal annars Gísla Martein „rétthugsuð“.
Hinn fyrrverandi aðstoðarmaður dómsmálaráðherra, Brynjar Níelsson er greinilega kominn aftur heim frá menningarferð sinni til Berlínarborgar en hann sparar ekki hæðnina í nýjustu Facebook-færslu sinni. Þar tekur hann meðal annars hanskann upp fyrir Samtökunum 22, sem margir telja haturssamtök gegn transfólki en þau harðneita fyrir það. Þá gerir hann stólpagrín að Gísla Marteini vegna stuðningsyfirlýsingu hans gagnvart Þórdísi Kolbrúnu R. Gylfadóttur utanríkisráðherra, á X-samfélagsmiðlinum.
Þá tekur hann einnig fyrir lausnir í loftslagsmálum og rífur þær í sig þar til nánast ekkert stendur eftir. Færsluna má lesa í heild sinni hér að neðan:
„Dagur 5 í Reykjavík. Tók eftir því á degi 1455 hjá gamla vélstjóranum á Tene að þeir sem eru ósammála honum í transhugmyndafræðinni eru auðvitað hatursfullir hægri öfgamenn, sem er einföld leið til að eyða allri rökræðu. Ef ég vissi ekki betur hefði ég haldið að vélastjórinn fyrrverandi væri gamall kommi og hefði verið blaðamaður á sumrin hjá Þjóðviljanum gamla með vélstjóranáminu.
Hinn mikli rétthugsuður, Gísli Marteinn, er himinlifandi með að utanríkisráðherra TRÚI á loftslagsbreytingar af mannavöldum. Ég hélt að þetta væri nú ekki spurning um trú heldur vísindalegan sannleik. Ég veit ekkert hverju vinkona mín Þórdís Kolbrún trúir og vona að hún trúi ekki á Guð almáttugan því fátt er verra og hættulegra nú til dags. En ég trúi að loftslagsbreytingar séu af mannavöldum núna, alveg eins og ég trúi því að loftslagsbeytingar fyrir 70 milljónum ára hafi verið af risaeðla völdum.Ég trúi líka, eins og ESB, að hægt sé að skattleggja loftslagsbreytingar í burtu. Og þegar atvinnulífið í evrópu verður ekki lengur samkeppnishæft tekur auðvitað við kolefnisjafnaður sjálfsþurftarbúskapur og við evrópubúar náum að bjarga jörðinni þótt við séum ekki nema 7% jarðarbúa. En það verður seint sagt að við séum heimskir.Þetta er Brynjar Níelsson, sem talar frá Birkihlíð 14, 105 Reykjavík“
Athugasemdir