Myndband af ræðu þingmannsins Áslaugar Örnu Sigurbjörnsdóttur síðastliðið þriðjudagskvöld hefur gengið á milli fólks á samfélagsmiðlum. Þar sést þingkonan blanda sér í umræður í ræðustól á Alþingi um frumvarp um leigubílaakstur. Störf þingsins teygðu sig inn í kvöldið frá miðjum degi og var þeim lokið skömmu fyrir miðnætti.
Mikið álag hefur verið á þingmönnum vegna komandi þingfrestunar. Þingmenn vinna nú að því að ljúka vinnu fyrir sumarfrí, sem áætlað er að hefjist 13. júní. Aðeins 11 starfsdagar eru eftir á þingi fram að því, samkvæmt starfsáætlun. Klukkan var orðin tíu mínútur gengin í 11 þegar Áslaug Arna steig þreytuleg í ræðustól. Að baki henni reis úr sæti Ingvar Þóroddsson, annar varaforseti Alþingis, til að kynna hana í pontu.
Áslaug Arna hafði fyrr um daginn birt af sér mynd á Instagram sitjandi með vinkonu sinni, fyrrverandi lögfræðingi í dómsmálaráðuneytinu, við spilið backgammon í bakgarði Jómfrúarinnar við Lækjargötu, með hvítvínsglas sér við hlið, síðla seinni parts.
Hitabylgja hefur riðið yfir landið síðustu daga og í sjálfvirkri mælingu Veðurstofunnar í Hljómskálagarðinum, sem næst er miðborg Reykjavíkur, náði hitastigið 16,7 gráðum klukkan 15 í hægri, breytilegri átt og heiðskíru. Var hiti enn 14 gráður í bakgarðinum þegar skuggi náði þar yfir klukkan 19 þann daginn.
Frumvarp ríkisstjórnar var lagt fram af Eyjólfi Ármannssyni innviðaráðherra og gengur það að hluta gegn lögum sem sett voru í tíð fyrri ríkisstjórnar, sem Áslaug Arna var aðili að og átti að auka frelsi í leigubílaakstri, með umdeildum afleiðingum.
Áslaug Arna vakti snemma athygli á stjórnmálaferli sínum með baráttu fyrir rýmkun á sölu áfengis. Sem formaður Heimdallar, félags ungra sjálfstæðismanna í Reykjavík, tjáði sig í viðtali við Fréttatímann 2013, um að ef fólk vildi fá sér rauðvín með steik eða hvítvín með humri ætti það að geta farið út í verslun, sama á hvaða tíma dags, og keypt vínið. Ummælin vöktu mikla athygli og umræðu um stefnu Sjálfstæðisflokksins, ekki síst vegna forgangsröðunar samtímis og uppgjör vegna efnahagshruns stóð yfir.
Áfengisneysla þingmanna á dögum þar sem þingfundir standa yfir hafa hins vegar verið viðkvæmt umræðuefni. Sigmundur Ernir Rúnarsson, þingmaður Samfylkingarinnar, baðst afsökunar í upphafi þingfundar árið 2009 á þeim „mistökum“ að hafa drukkið léttvín áður en hann mætti á Alþingi, en þar hélt hann ræðu sem vakti athygli af sökum framsögunnar. Hann kvaðst þó hafa drukkið en ekki kennt áhrifa.
Áslaug Arna hefur ekki svarað fyrirspurn Mannlífs um efnið.
Breytingar eru að verða á högum Áslaugar Örnu. Hún bauð sig fram til formennsku í Sjálfstæðisflokknum á landsfundi í byrjun mars. Rúmlega tveimur mánuðum fyrr hafði Áslaug vakið landsathygli þegar hún bjargaði matargesti frá köfnun á veitingastaðnum Kastrup við Hverfisgötu, með beitingu Heimlich-aðferðarinnar. Í framboðsræðu sinni fyrir landsfundi nefndi Áslaug að sitjandi ríkisstjórn stæði á öndinni, en kynni ekki Heimlich-aðferðina.
Veitingastaðurinn Kastrup var síðan innsiglaður í byrjun maí vegna skattaskuldar og gestum vísað út frá hálfkláruðum máltíðum. Svo vildi til að sama dag tilkynnti Áslaug Arna um tímabundið brotthvarf sitt úr stjórnmálum.
Ingvar Þórddsson, annar varaforseti þingsins, átti eftir að koma við sögu í fréttaflutningi þegar hann tilkynnti í morgun að hann hefði tekið sér frí frá þingstörfum til að sækja sér áfengismeðferð á meðferðarheimilinu Vogi.
Áslaug tapaði naumlega formannskosningunni og flytur til New York í sumarlok til náms í opinberri stjórnsýslu og alþjóðaleiðtogafræðum.
Athugasemdir