Bandaríska ofurfyrirsætan Jessica White hefur sætt gagnrýni á samfélagsmiðlum eftir ummæli sem hún lét falla í viðtali við TMZ á dögunum, þar sem hún sagði tvíkynhneigða karlmenn vera „óaðlaðandi“.
White lét ummælin falla á viðburði í Beverly Hills sem haldinn var í tengslum við vitundarvakningu um legslímuflakk. Þar ræddi hún meðal annars um mismunandi viðhorf til kynhneigðar karla og kvenna.
Í viðtalinu sagði White að hún telji að tvöfalt siðgæði sé til staðar í samfélaginu. „Ég myndi líka segja að það sé í lagi fyrir konu að vera svolítið tvíkynhneigð, en ef karl gerir það…,“ sagði hún og bætti við að konur hafi að hennar mati meira svigrúm til að kanna kynhneigð sína.
Ummælin vöktu fljótt viðbrögð á netinu og gagnrýndu margir orð hennar. Einn notandi á samfélagsmiðlum skrifaði meðal annars að það væri „náttúrulegt“ að bæði karlar og konur gætu upplifað kynhneigð á mismunandi hátt og gagnrýndi þá hugmynd að mismunandi reglur ættu að gilda eftir kyni.
White tilkynnti nýverið trúlofun sína við listamanninn Nathan Wong. Áður var hún í átta ára fjölástarsambandi með grínistanum Nick Cannon.
Athugasemdir