Maki Nicolu Bulley heitinnar, Paul Ansell, hefur í fyrsta sinn í tvö ár tjáð sig opinberlega um missinn og gefið innsýn í það sem fjölskyldan gekk í gegnum eftir hvarf hennar.
Að morgni 27. janúar 2023 virtist dagurinn hefjast með venjubundnum hætti fyrir Nicolu, 45 ára tveggja barna móður. Hún fór með dætur sínar í skólann í þorpinu St Michael's on Wyre í Lancaskíri í Englandi og fór síðan í göngutúr með hund sinn við ána River Wyre.
Skömmu síðar tók hún þátt í vinnufundi á netinu, sem lauk um klukkan 9:30. Nokkrum mínútum síðar fannst sími hennar skilinn eftir á bekk við árbakkann, ásamt taum og beisli hundsins sem gekk laus. Þá var ljóst að eitthvað var ekki í lagi og viðamikil leit hófst með aðkomu lögreglu, þyrlna og leitarhunda.
Málið vakti gífurlega athygli, bæði í Bretlandi og víðar. Íbúar svæðisins tóku þátt í leitinni, en jafnframt spruttu upp fjölmargar samsæriskenningar á samfélagsmiðlum. Sérstaklega vakti athygli að fólk á TikTok reyndi að „leysa“ málið og sumir beindu grun að Paul sjálfum án nokkurra raka.
Paul hefur nú loks opnað sig um málið og segist hann hafa orðið fyrir miklu álagi frá fjölmiðlum og samfélagsmiðlum:
„Þetta var 27. janúar 2023 og Nikki fór með stelpurnar í skólann og kom aldrei heim. Ég varð að umfjöllunarefni fjölmiðla, í þeim skilningi að spurt var: ‚Hvar er makinn? Af hverju tjáir hann sig ekki?‘ eða eitthvað þess háttar,“ sagði hann á fyrirlestri sem haldinn var í London School of Economics (LSE) á mánudaginn,“ segir Paul og heldur áfram:
„Ég fór út úr bílnum og ég held að ég hafi í rauninni ekki vitað hvað ég var að gera. Ég fór út úr bílnum, svo var ég gripinn af Sky og á næstu mínútu var ég í þessu viðtali. En svo ertu auðvitað, þú veist, sálgreindur, greindur. Augun í þér eru ekki rétt, þú ert með glott. Þetta voru ekki blöðin eða fréttirnar. Þetta var meira TikTok. Þetta var mjög íþyngjandi og hræðileg upplifun, sérstaklega á sama tíma og við vorum að ganga í gegnum allt þetta. Þetta getur alveg gleypt mann“.
Leitin að Nicola stóð yfir í 23 daga áður en lík hennar fannst í ánni. Dánarrannsókn síðar sama ár leiddi í ljós að hún hefði fallið í ískalt vatnið og drukknað nær samstundis.
Þrátt fyrir það hélt umræðan áfram á samfélagsmiðlum, og jafnvel eftir að lík hennar fannst var myndband af upptöku af vettvangi dreift á netinu, sem vakti mikla reiði en þar mátti sjá lík Nikolu dregið upp úr ánni.
Paul hefur sagt að hann eigi enn erfitt með að sætta sig við missinn og að hann sjái Nicola í dætrum þeirra á hverjum degi:
„Ég á enn erfitt með að tala um Nikki í þátíð. Ég sé hana í stelpunum á hverjum einasta degi,“ sagði hann.
Hann segir þó markmið sitt vera að veita dætrum sínum eins eðlilegt líf og mögulegt er, með stuðningi fjölskyldu og vina.
Skýrsla frá College of Policing hefur bent á að áhrif samfélagsmiðla á lögreglurannsóknir séu vaxandi vandamál og geti haft alvarleg áhrif á bæði rannsóknir og aðstandendur.
Athugasemdir