Skólameistari FS hefur fengið nóg og er hættur

Kristján Ásmunds­son skóla­meist­ari FS hefur sagt starfi sínu lausu, þrátt fyrir að eiga eitt ár eftir af fimm ára skip­un­ar­tíma sínum. Með því lýkur hann tæp­lega 40 ára starfs­ferli við Fjöl­brauta­skóla Suð­ur­nesja, þar sem hann hóf störf árið 1986. Þetta kemur fram í til­kynn­ingu á heima­síðu skól­ans.

Hann greindi starfs­fólki frá ákvörðun sinni á fundi í morgun og vöktu tíð­indin sterk við­brögð. Margir urðu slegnir og sumir felldu tár. Kristján hefur um ára­bil verið far­sæll stjórn­andi og notið mik­illar virð­ingar innan skól­ans.

Að sögn Krist­jáns átti hann fund með full­trúum mennta­mála­ráðu­neyt­is­ins fyrr um dag­inn þar sem rætt var um fyr­ir­hug­aða við­bygg­ingu við skól­ann. Sú fram­kvæmd hefur verið til umræðu í tvö ár, en á fund­inum kom fram að enn liggja ekki fyrir neinar ákvarð­anir um tíma­setn­ingu eða fram­gang verk­efn­is­ins.

Því er ljóst, sam­kvæmt til­kynn­ing­unni, að skól­inn þarf áfram að búa við þröngan húsa­kost. Kennsla fer nú meðal ann­ars fram í þremur gámum og í leigu­hús­næði á tveimur stöðum í bæj­ar­fé­lag­inu. Þá hefur einnig þurft að breyta geymslum í kennslu­rými og aðlaga bók­náms­stofur að verk­legri kennslu.

Skólinn er fjöl­breyttur og gegnir mik­il­vægu hlut­verki á Suð­ur­nesjum, meðal ann­ars með stórri starfs­braut og nem­endum af ólíkum menn­ingar- og tungu­mála­bak­grunni. Hins vegar er aðstöðu­leysi nú farið að hafa veru­leg áhrif á starf­sem­ina, að því er fram kemur í til­kynn­ing­unni.

Kristján segir að nú sé komið nóg og að hann sjái ekki fram á frek­ari árangur í mál­inu. Hann harmar jafn­framt skort á áhuga stjórn­valda á mál­efnum skól­ans og telur það hafa haft áhrif á ákvörðun sína um að hætta.

Nemendur skipuleggja mótmæli

Tristan Ein­ars­son, for­maður Nem­enda­fé­lags FS segir í sam­tali við Mannlíf að mikil óánægja sé með ástandið í skól­anum og að nem­endur standi við bakið á Krist­jáni.

„Nemendur eru heldur betur óánægðir. Mennta­mála­ráðu­neytið er ekki bara að gefa Krist­jáni skóla­meist­ara, heldur nem­endum öllum, blauta tusku í and­litið.“

Segir Tristan að fyrir löngu sé kom­inn tími á að stækka skól­ann og nefnir sem dæmi að kofar sem nem­endur á húsa­smíða­braut skól­ans smíð­uðu, séu meðal ann­ars not­aðir undir kennslu­stofur og að bóka­safnið hafi verið minnkað.

Að sögn Tristan ætla nem­endur að skrópa í skól­ann á morgun og mót­mæla við mennta­mála­ráðu­neytið.

„Við ætlum að ganga út úr skól­anum á eftir og hvetja fólk til að mæta ekki í skól­ann á morgun.“