Nýr vegarkafli um Hornafjörð og fjórar nýjar tvíbreiðar brýr voru formlega teknar í notkun í dag. Við þessa framkvæmd styttist Hringvegurinn um 12 kílómetra. Leiðin á milli Reykjavíkur og Hafnar í Hornafirði styttist enn frekar, eða um 14,6 kílómetra.
Ragnar Þór Ingólfsson, starfandi innviðaráðherra, Bergþóra Þorkelsdóttir, forstjóri Vegagerðarinnar, og Gauti Árnason, formaður bæjarráðs Hornafjarðar, klipptu á borðann við hátíðlega athöfn á nýrri brú yfir Hornafjarðarfljót að viðstöddum fjölda gesta. Kvennakór Hornafjarðar söng við vígsluna, en kórinn vakti athygli á mikilvægi breytinganna árið 2020 með því að syngja á öllum einbreiðum brúm í sýslunni.
„Með nýjum vegi og fjórum tvíbreiðum brúm yfir Djúpá, Hornafjarðarfljót, Hoffellsá og Bergá er stigið stórt skref í átt að auknu umferðaröryggi. Við erum að fækka hættulegum stöðum á leiðinni, jafna aðstæður og gera ferðalög öruggari fyrir alla,“ sagði Ragnar Þór Ingólfsson, starfandi innviðaráðherra, í ávarpi sínu og bætti við: „Þessi framkvæmd styrkir tengingar milli þéttbýlisstaða á svæðinu. Fólk getur sótt vinnu og þjónustu með auðveldari hætti, fyrirtæki geta unnið á stærra svæði og ný tækifæri skapast fyrir ferðaþjónustu og aðrar atvinnugreinar.“
Umfangsmikil mannvirkjagerð
Framkvæmdin er ein sú stærsta á svæðinu í áraraðir og felur í sér:
- Tæpa 19 kílómetra af nýjum Hringvegi.
- 9 kílómetra af tengdum hliðarvegum.
- Fjórar nýjar tvíbreiðar brýr (samtals 468 metrar) yfir Djúpá, Hornafjarðarfljót, Hoffellsá og Bergá.
- Nýtt hringtorg og áningarstað við Hafnarveg.
Með tilkomu nýju brúnna fækkar einbreiðum brúm á Hringveginum úr 29 niður í 26. Þetta fækkar slysahættum og jafnar akstursaðstæður.
Fyrsta stóra samvinnuverkefnið
Verkið er það fyrsta sinnar tegundar sem unnið er samkvæmt löggjöf um samgönguframkvæmdir þar sem ráðist er í samvinnuverkefni af þessari stærð á vegum Vegagerðarinnar.Eyjólfur Ármannsson innviðaráðherra leggur áherslu á mikilvægi þessa nýja rekstrarforms:
„Nýr Hringvegur um Hornafjörð er fyrsta samvinnuverkefnið af þessari stærð sem ráðist er í á vegum Vegagerðarinnar samkvæmt löggjöf um samgönguframkvæmdir. Veggjöld af umferðinni renna óskipt til nýs innviðafélags í eigu ríkisins og verður þeim varið í að viðhalda þessum tiltekna vegarkafla og fjármagna nýjar framkvæmdir. Með þessu nýja fyrirkomulagi verður hægt að flýta uppbyggingu samgöngumannvirkja um allt land til muna.“
Samið var við verktakafyrirtækið Ístak í júlí 2022 og hófust framkvæmdir það sama haust, en fyrstu áætlanir um verkið teygja sig aftur til ársins 2004.
Sjálfvirk innheimta veggjalda hefst 1. september
Veggjald verður innheimt á kaflanum frá og með 1. september næstkomandi. Gjaldtakan verður fyllilega rafræn og sjálfvirk í samræmi við lög um samvinnuverkefni, sem gera ráð fyrir að veggjöld standi undir að lágmarki 50% af byggingarkostnaði, viðhaldi, rekstri og þróun mannvirkisins.Myndavélar munu lesa bílnúmer ökutækja sjálfkrafa og fletta þeim upp í ökutækjaskrá. Vegfarendur þurfa ekki að skrá sig eða stoppa til að greiða á veginum, heldur verða reikningar sendir beint í heimabanka um hver mánaðamót.
Athugasemdir