Kylie Jenner, bandarísk fyrirsæta og áhrifavaldur, hefur verið stefnt fyrir dómstóla af fyrrverandi einkakokki sínum sem sakar hana og aðila sem störfuðu fyrir heimili hennar um að hafa skapað óviðunandi vinnuaðstæður sem leiddu til þess að hún missti fóstur. Þetta kemur fram í nýrri málsókn sem lögð var fram í vikunni.
Samkvæmt málsókninni hóf konan störf fyrir Jenner í lok nóvember árið 2024. Skömmu síðar hafi hún greint yfirmönnum sínum frá því að hún væri þriggja mánaða ófrísk.
Konan heldur því fram að hún hafi ítrekað þurft að vinna 11 til 12 tíma vinnudaga, fimm daga vikunnar, auk þess að sinna líkamlega erfiðum verkefnum þrátt fyrir meðgönguna.
Í stefnunni segir að á gamlárskvöld 2024 hafi henni verið gert að flytja þunga matvöru yfir götu og upp brekku án aðstoðar. Hún segist hafa orðið svo örmagna að hún hafi átt erfitt með andardrátt og þurft aðstoð öryggisvarða sem hafi komið henni til hjálpar.
Þá segir að um mánaðamótin janúar og febrúar 2025 hafi hún unnið við afmælisveislu barns Jenner í Palm Springs. Þar hafi hún aftur þurft að sinna krefjandi verkefnum án nægilegrar aðstoðar, þrátt fyrir að hafa óskað eftir aðstoð frá yfirmönnum sínum.
Daginn eftir segist hún hafa vaknað með miklar blæðingar og verið flutt á sjúkrahús þar sem læknar hafi staðfest að hún hefði misst fóstrið.
Konan segir missinn hafa haft djúpstæð áhrif á sig andlega og líkamlega. Hún fullyrðir jafnframt að yfirmaður á heimili Jenner hafi síðar ávítað hana vegna sorgar hennar og sagt að hegðun hennar hefði neikvæð áhrif á Jenner.
Þetta er þriðja málsóknin sem beinist að Kylie Jenner á síðustu mánuðum. Áður hafa tveir einstaklingar, sem segjast hafa starfað sem húshjálpar hjá henni, höfðað mál vegna meintra vinnuaðstæðna.
Ekki hefur verið greint frá því að Kylie Jenner eða fulltrúar hennar hafi svarað ásökununum opinberlega.
Athugasemdir