Fjölskylda lenti í skotárás á bílastæði skyndibitastaðarins McDonald's í Hallandale Beach í Flórída í Bandaríkjunum þann 27. júní með þeim afleiðingum að 11 ára stúlka hlaut alvarlegt skotsár á höfði og faðir hennar særðist á fæti.
Samkvæmt upplýsingum sem fram koma á söfnunarsíðu sem samstarfsfélagar föður stúlkunnar, Oscars, hafa sett á laggirnar hafði fjölskyldan ekkert með átökin að gera. Fjölskyldan hafði nýlega komið á staðinn til að kaupa sér hádegisverð. Móðirin fór inn á veitingastaðinn til að sækja matinn á meðan Oscar beið í bifreiðinni með þremur börnum þeirra.
Á meðan fjölskyldan sat í bílnum braust skyndilega út skotbardagi milli annarra aðila á bílastæðinu. Oscar varð fyrir skoti í fótlegg en 11 ára dóttir hans fékk skotsár á höfuðið. Hin tvö börnin sluppu ómeidd en urðu vitni að atburðinum.
Oscar hefur verið útskrifaður af sjúkrahúsi og er nú í bata heima fyrir. Dóttir hans er hins vegar enn á sjúkrahúsi undir sérhæfðri meðferð. Læknar hafa komist að þeirri niðurstöðu að of áhættusamt sé að fjarlægja kúluna úr höfði hennar að svo stöddu þar sem slíkt gæti valdið frekari og alvarlegri skaða. Hún er sögð vera í stöðugu ástandi en fram undan er langt bataferli.
Fjölskyldan stendur nú frammi fyrir umtalsverðum kostnaði vegna sjúkrahúsdvalar, endurhæfingar og tekjutaps auk þess sem hún þarf að styðja börnin við að vinna úr því áfalli sem þau urðu fyrir.
Rannsókn lögreglu á skotárásinni stendur yfir.
Athugasemdir