Kjartan Guðbergsson, yfirleitt kallaður Daddi Disco, segir frá leiðindum sem hafa náð langt fram úr meðalhófi í opinberri færslu.
Daddi og kona hans Sara Pálsdóttir framkvæmdastjóri Samskipta hafa verið að deila bíl vegna þess að þau starfa bæði í miðbænum. Þau vinna hvort á sínum vinnustaðnum svo Daddi segist ávallt stökkva inn og út nærri sínum vinnustað. Bíllinn var að sögn Dadda stopp í einhverjar sekúndur uppi á gangstétt þegar stöðumælavörður sektaði þau og sendi sektartilkynningu upp á tíu þúsund krónur.
„Við hjónin höfum í sumar deilt bíl á leið í og úr vinnu þar sem við störfum bæði í miðbænum. Þar sem við erum á sitthvorum vinnustaðnum þarf ég að stökkva út og inn nærri minni starfstöð. Sökum aldurs er mér ókleift að gera það á ferð, þannig að líkt og flestir leyfum við okkur að stoppa örstutt þar sem ekki er hætta og mér hleypt út, eða eftir atvikum - inn.
Í síðustu viku náðist slíkt atvik á mynd þegar að frúin stöðvaði í einhverjar sekúndur til að pikka mig upp. Þar var að verki árvökull stöðumælavörður sem er í fullum rétti þar sem ekki má stöðva eða leggja uppi á gangstétt. 6 mínutum síðar var komin sektartilkynning á ísland.is og greiðsluseðill upp á 10 þúsara í heimalandsbankann.“
Daddi bendir á að ekki hafi verið mikil hætta á ferð þá stundina og er ekki skemmt. Þó segir hann í kaldhæðni að hann hafi nú verið nálægt Seðlabankanum svo kannski hafi þau bara verið nærri því að fella krónuna.
„Ég andmælti, vitandi að niðurstaðan yrði alltaf vísun í umferðalög og bann við stöðvun og/eða lagningu uppi á gangstétt. Andmælti ekki af því að ég taldi mig/okkur ekki hafa brotið lög, heldur af því að þarna er sterkt dæmi um skort á aðstæðuvitund, dómgreind, og umburðarlyndi. Þetta eru leiðindi langt fram úr meðalhófi, og líklega afleiðing persónulegra áfalla sem brýst fram í hvata til að bara fokking sekta þetta lið sem fer ekki eftir reglum.
Reglum sem eru settar til að forða slysi eða tjóni á fólki og verðmætum.
Eins og sést á myndinni sem var tekin, stefndi þetta skeytingaleysi okkar fólki, fé og atvinnustarfsemi í bráða hættu. Öll þessi ökutæki í kringum okkur hefðu getað lent í ógöngum, já og allt þetta gangandi fólk sem sést á myndinni er heppið að sleppa lifandi. Ég meina Seðlabankinn er þarna nærri og við vorum nærri því að fella krónuna. Ingólfur næstum dottinn af stallinum og gera þurfti hlé á réttarhöldum í Hæstarétti.
Mér er lífsins ómögulegt að skilja hvernig er ætlast til að við hefðum átt að leysa þetta. Finna stæði fyrir örugga uppítöku? Já gangi okkur vel með það í miðbænum.
Nei í alvöru, fyrir tíu fokking þúsund kall hef ég, reyndar ekki samkvæmt lögum öðrum en óskalögum, fullan rétt til að tuða yfir þessu. Njótið myndarinnar. Ekki oft sem þessir leggir sjást berir í bænum.“
Mynd var tekin af brotinu sem Daddi fékk senda frá Reykjavíkurborg eftir að hann andmælt.
„Vil hæla yndislegu konunni í Þjónustuveri Reykjavíkurborgar sem gat sent mér myndina eftir að hún hvarf úr sektartilkynningunni (í kjölfar andmæla minna). Höfundum og eigendum flutningsréttar á Borgarbrag Gunnars Þórðarsonar bendi ég að banna notkun tónlistarinnar sem biðtóna í Þjónustuverum. Býr til neikvæða hugræna tengingu þeirra sem hringja inn við þá frábæru tónlist sem platan geymir.“
Athugasemdir