Ísraelsk loftárás varð sex manna fjölskyldu að bana í Gaza-borg á þriðjudag. Foreldrar og fjögur börn þeirra létust þegar sprengja hæfði heimili þeirra í Sabra-hverfinu, að sögn heilbrigðisyfirvalda á svæðinu.
Samkvæmt upplýsingum var fjölskyldan sofandi þegar árásin átti sér stað. Hin látnu voru Firas al-Masri, eiginkona hans Salsabeel al-Masri og þrjár dætur þeirra ásamt syni.
Með þessum árásum hefur fjöldi Palestínumanna sem hafa fallið í ísraelskum loftárásum frá því að vopnahlé, sem Bandaríkin studdu, tók gildi fyrir rúmum níu mánuðum farið yfir 1.150. Flest fórnarlambanna eru óbreyttir borgarar. Þrátt fyrir vopnahlé hafa ísraelskar loftárásir haldið áfram nær daglega.
Ísraelsher staðfesti árásina og sagði að skotmarkið hefði verið meðlimur Hamas-samtakanna. Herinn kvaðst enn vera að kanna afleiðingar árásarinnar.
Myndskeið sem Reuters-fréttastofan hefur undir höndum sýnir björgunarfólk berjast við að slökkva eld í húsinu og bera lík út vafin hvítum líklæðum.
Abu Yusuf al-Masri, faðir Firas al-Masri, sagði í samtali við Reuters að sprengingin hefði orðið meðan fjölskyldan svaf.
„Við gátum ekki bjargað barnabörnunum okkar og börnunum úr eldinum og eyðileggingunni. Um fimm eða sex voru drepin, flest börn og konur, miskunnarlaust og án nokkurrar viðvörunar,“ sagði hann fyrir utan heimili fjölskyldunnar.
Hann bætti við: „Það er ekkert raunverulegt vopnahlé og hvergi öruggt fyrir Palestínumenn.“
Miðlunartilraunir Egyptalands, Katar, Tyrklands og Bandaríkjanna til að hrinda í framkvæmd áætlun Donalds Trump Bandaríkjaforseta um að binda enda á átökin hafa hingað til skilað litlum árangri. Áætlunin felur meðal annars í sér afvopnun Hamas og brotthvarf ísraelskra hersveita.
Sameinuðu þjóðirnar hafa fordæmt áframhaldandi árásir Ísraels á Gaza.
„Níu mánuðum eftir að tilkynnt var um vopnahlé er hvergi öruggt fyrir Palestínumenn á Gaza,“ sagði Thameen Al-Kheetan, talsmaður mannréttindaskrifstofu Sameinuðu þjóðanna, á blaðamannafundi í Genf.
Að hans sögn létust að minnsta kosti 57 Palestínumenn, þar af sex börn og átta konur, í ísraelskum árásum á tímabilinu 13. til 20. júlí. Tölurnar ná þó ekki til árásarinnar sem varð al-Masri-fjölskyldunni að bana.
„Dráp óbreyttra borgara í þessum árásum vekur áhyggjur af áframhaldandi brotum á alþjóðlegum mannúðarlögum, stríðsglæpum og öðrum mögulegum voðaverkum á Gaza,“ sagði Al-Kheetan og bætti við:
„Samkvæmt alþjóðalögum eru vísvitandi árásir á óbreytta borgara stríðsglæpur.“
Athugasemdir