„Fólk með milljónir á mánuði veit ekkert hvernig er að lifa með krónunni“

Signý Sig­urð­ar­dóttir við­skipta­fræð­ingur og stjórn­mála­kona seg­ist hafa snöggreiðst þegar hún heyrði rök­stuðn­ing Áfram Íslands. Gagn­rýnendur Áfram Íslands telja mál­flutn­ing þeirra ein­kenn­ast af veru­leikafirr­ingu og að töl­fræði sé hag­rætt til að fegra stöð­una á íslenskum vinnu- og hús­næð­is­mark­aði. Vaxandi hiti er í umræð­unni um fram­tíð íslenska efna­hags­kerf­is­ins og gjald­mið­ils­ins og sú rök­semda­færsla að Ísland sé í „afburða­deild“ þegar kemur að vel­ferð almenn­ings mætir nú harðri and­stöðu frá fólki sem stendur í stríði við hátt vaxta­stig, verð­trygg­ingu og eft­ir­köst efna­hags­hruns­ins.

„Ég snöggreidd­ist í gær þegar ég átt­aði mig hvers konar mála­til­búnað elítan í Áfram Ísland hefur sett fram til að rök­styðja mál sitt um að við eigum að segja nei í ágúst.“

Horft fram hjá afleiðingum hrunsins

Gagn­rýnendur benda á að mál­flutn­ingur þeirra sem verja núver­andi kerfi taki iðu­lega mið af upp­haf­s­punktum í töl­fræði sem þjóni hags­munum þeirra, á meðan horft sé fram hjá hrun­inu og þeim var­an­lega skaða sem það olli á lífs­kjörum almenn­ings. Efna­hags­hrunið hafi ekki síst stafað af gagn­rýn­is­leysi og hjarð­hegðun innan við­skipta­lífs­ins, en afleið­ing­arnar hafi bitnað þyngst á venju­legu launa­fólki sem enn eigi erfitt upp­dráttar.

„Ég skil ekki hvernig það getur við­geng­ist að ég og við "venju­legt launa­fólk" á Íslandi þurfi að standa í stríði við elítu sem er með margar millj­ónir á mán­uði í tekjur og veit ekk­ert um það hvernig það er að þurfa að borga íslenska vexti af hús­næð­is­láni í hverjum mán­uði og að auki verð­trygg­ingu og verð­tryggða vexti af náms­láni.

Þetta er eitt­hvað svo stór­kost­lega rangt og kol­geggjað. Að þessi elíta telji sig hafa heim­ild til þess að setja fram tölur sem sýna mynd af því að Ísland sé í "afburða­deild" þegar að vel­ferð hins venju­lega manns kemur og nota til þess upp­haf­s­punkt sem hentar þeirra mál­flutn­ingi. Tekur ekki hrunið með í reikn­ing­inn - hrunið sem eyði­lagði líf okkar margra - leiddi til þess að við áttum ekki sjens eftir það,“ segir Signý í opin­berri færslu.

Ekki enn komin með milljón á mánuði í tekjur

„Mér er rosa­lega mis­boðið og mér er alveg nákvæm­lega sama þó að það fari í illa í ein­hvern.

Það er algjör­lega morg­un­ljóst í mínum huga að fólk með margar millj­ónir í tekjur á mán­uði hefur enga vigt í þess­ari umræðu. Enga. Það veit ekk­ert um það hvernig það er að lifa með íslenskri krónu frá mán­uði til mán­aðar alla ævina. Hefur ekki hug­mynd.

Sú er þetta ritar orðin 63 ára og borgar enn 150.000 af 20 millj­óna króna hús­næð­is­láni og 30.000 kr. af náms­láni. Búin að vera á vinnu­mark­aði alla tíð síðan ég var 15 ára þar til mér var útskúfað eftir hrun en náði mér á strik aftur síð­ustu tvö ár. Ekki enn komin með milljón á mán­uði í tekjur.

Mér finnst það ekki í lagi að hafa þurft að upp­lifa hrunið á Íslandi fyrir 18 árum síðan og að sama elíta og kom okkur þangað fái að standa í vegi fyrir því að við fáum að eiga sjens á að losna undan krón­unni.

Hrunið sner­ist ekki um "vonda ein­stak­linga" eins og margur hefur viljað halda fram. Hrunið sner­ist um hjarð­hegðun og gagn­rýn­is­leysi heils hóps í við­skipta­lífi lands­ins sem leyfði öllu að keyra hér fram af brún­inni án þess nokkurn tíma að reyna að stöðva það sem var í gangi.

Þessi hópur virð­ist nú ætla að koma í veg fyrir að við fáum að eiga mögu­leika á að breyta efna­hags­um­hverfi okkar til fram­tíðar.

Það kemur ein­fald­lega ekki til mála. Þessi hópur á ekki að hafa neina vigt í þeirri ákvörðun sem framundan er.

Við eigum að fá frið fyrir þeim sem njóta forr­rétt­ind­anna.

Það er algjör­lega morg­un­ljóst og á ekki að þurfa að segja það einu sinni.“