Maður sem smíðaði sjálfur sólarorkuknúna snekkju fyrir um 20.700 bandaríkjadali, eða rúmlega 2,5 milljónir íslenskra króna, hefur nú siglt yfir 3.000 sjómílur án þess að nota einn einasta dropa af eldsneyti.
Snekkjan hefur verið á ferðalagi um Evrópu undanfarna mánuði og er eingöngu knúin rafmagni sem framleitt er með hefðbundnum sólarsellum á þaki hennar.
Hinn finnski Lukas Sjöman, sem hannaði og smíðaði bátinn sjálfur, segir verkefnið hafa gjörbreytt sýn sinni á langferðir á sjó. Að hans mati gætu sólarorkuknúnir bátar orðið framtíð margra bátaeigenda.
Knúin af sólinni
Ólíkt flestum rafknúnum snekkjum, sem þurfa reglulega að tengjast hleðslustöðvum, framleiðir Helios 11 rafmagn sitt sjálf.
Hin ellefu metra langa snekkja var smíðuð í Finnlandi og er búin tíu hefðbundnum sólarsellum af þeirri gerð sem notuð er á íbúðarhúsum. Þær hlaða stöðugt 24 kílóvattstunda rafhlöðupakka yfir daginn.
Rafhlöðurnar knýja síðan sex kílóvatta rafmótor sem gerir bátnum kleift að sigla án bensíns eða dísilolíu.
Í nýlegu myndbandi sínu, sem tekið var við Miðjarðarhafsströnd Spánar, greinir Sjöman frá því að báturinn hafi nú farið yfir 3.000 sjómílur eingöngu á sólarorku.
Á einni 30 sjómílna siglingu áætlar hann að hafa sparað um 46 bandaríkjadali í eldsneytiskostnaði með því að nýta einungis orku sólarinnar.
Þar sem sólarsellurnar geta framleitt allt að 4.000 vött við bestu aðstæður notar báturinn oft lítið sem ekkert af orkunni sem geymd er í rafhlöðunum á meðan hann er á siglingu.
Þegar hann liggur fyrir akkeri á sólríkum dögum geta rafhlöðurnar jafnvel hlaðist aftur í 100 prósent á meðan eigandinn slakar á, syndir eða skoðar nærliggjandi strendur.
Smíðaði bátinn sjálfur
Sjöman hefur einnig birt sundurliðun á kostnaði við verkefnið. Samkvæmt honum kostaði rafhlöðupakkinn um 2.900 dali en rafmótorinn á bilinu 4.000 til 4.600 dali.
Sólarsellurnar kostuðu um 860 dali og jafn mikið fór í hleðslustýringar fyrir kerfið. Afgangurinn af kostnaðinum fólst í byggingarefni á borð við krossvið, trefjaplast, epoxý, timbur og málningu.
Hann áætlar að efniskostnaður við sambærilegan bát sé um 20.700 dalir. Með verkstæðisaðstöðu, verkfærum og rafmagnskostnaði gæti heildarverðið numið á bilinu 23.000 til 34.500 dölum.
Ef slíkur bátur væri hins vegar smíðaður af fagfólki gæti verðið orðið á bilinu 69.000 til rúmlega 92.000 bandaríkjadalir.
Sjöman segir verkefnið sýna að venjulegt fólk geti smíðað hagkvæma og langdræga sólarorkubáta án þess að eyða stórfé. Hann vinnur nú þegar að hönnun enn stærri, 16 metra langs tvíbytnu sem verður einnig knúinn eingöngu af sólarorku.
Athugasemdir