Landsréttur staðfesti í síðustu viku úrskurð Héraðsdóms Norðurlands eystra um að karlmaður sæti gæsluvarðhaldi til 9. október. Maðurinn er grunaður um ítrekuð kynferðisbrot og alvarlegt ofbeldi gegn sambýliskonu sinni um margra ára skeið.
Málið kom upp undir lok ágúst þegar lögregla kom á heimili parsins. Konan lýsti þá langvarandi líkamlegu og kynferðislegu ofbeldi, auk stjórnunar og kúgunar. Sagði hún manninn meðal annars hafa tekið sig ítrekað hálstaki, stungið sig í bakið og neytt sig til kynlífs.
Við rannsókn málsins fann lögregla myndefni í síma mannsins þar sem hann virtist hafa samfarir við konuna meðan hún svaf. Konan kvaðst ekki hafa vitað af upptökunum.
Maðurinn hefur játað hluta brotanna en segir þau færri en konan lýsir. Þá liggur fyrir að hann hafi hótað sjálfsvígi og lífláti konunnar og barna þeirra.
Lögmaður mannsins krafðist þess að gæsluvarðhaldinu yrði aflétt eða honum komið fyrir á viðeigandi heilbrigðisstofnun. Landsréttur hafnaði kröfunni og staðfesti úrskurðinn.
Athugasemdir