Nígeríski dansarinn Benjamin Daniel, betur þekktur sem Ben Dancer, lauk á þriðjudag sjö daga tilraun sinni til að setja heimsmet í lengsta dansmaraþoni einstaklings. Hann dansaði samfellt í 176 klukkustundir, 52 mínútur og 59 sekúndur í Lagos.
Daniel hóf tilraunina 22. september með það að markmiði að slá núverandi met, sem indverski dansarinn Srushti Sudhir Jagtap setti árið 2023. Hún var þá 16 ára og dansaði samfellt í 127 klukkustundir.
Stuðningsmenn dansarans söfnuðust saman í Freedom Park í Lagos á meðan á tilrauninni stóð. Ungir Nígeríumenn hvöttu Daniel áfram, tóku upp frammistöðu hans og dönsuðu með honum fyrir aftan öryggishlið.
Á einum tímapunkti samhæfði lítill hópur áhorfenda dansspor sín við hreyfingar hans á meðan vinsæl afróbítlög, með þekktum danssporum, ómuðu um svæðið.
„Dansinn er honum andlegur,“ sagði aðstoðarkona hans, Mercy Idisi, við AFP-fréttastofuna á meðan hann hélt áfram að dansa.
Að sögn aðstandenda hans sótti Daniel innblástur í fjölbreyttar tónlistar- og menningarhefðir Nígeríu stóran hluta dansmaraþonsins.
Afróbít var áberandi í tónlistinni, en einnig mátti heyra tónlistarstefnur á borð við fuji, djass og zouk. Stundum skipti Daniel um dansklæðnað og klæddist hefðbundnum nígerískum fatnaði.
Undirbúningur Daniels fyrir mettilraunina hófst árið 2022. Hann stundaði þá líkamsrækt til að byggja upp vöðva, æfði sig í að þola sársauka og auka úthald sitt og tók einnig þátt í æfingum þar sem hann svaf lítið til að búa sig undir álagið.
Þremur vikum áður en hann hóf tilraunina meiddist Daniel á hnjánum. Það vakti áhyggjur skipuleggjenda um að meiðslin gætu haft áhrif á mettilraunina.
Hann glímdi þó ekki við nein alvarleg heilsufarsvandamál á þeim sjö dögum sem dansáskorunin stóð yfir, að sögn Chika Anagoba, læknis sem fylgdist með honum.
„Að breyta heiminum með dansi“
Við jaðar svæðisins þar sem lítill hópur fólks dansaði sátu íbúar úr heimabyggð Daniels í Bauchi-héraði í norðurhluta Nígeríu á plaststólum og gæddu sér á jollof-hrísgrjónum og hrásalati, sem eru meðal algengra rétta í landinu.
„Við höfum verið hér frá fyrsta degi,“ sagði Ibrahim við AFP. „Við erum svo stolt af honum.“
„Þetta sýnir mér að ég get áorkað stórum hlutum þótt ég komi frá litlum stað og að ég geti breytt heiminum með dansi,“ sagði Daniel við AFP eftir að hafa lokið mettilraun sinni.
Daniel hafði þrisvar sinnum sótt um hjá Heimsmetabók Guinness áður en hann fékk leyfi til að reyna við metið í febrúar. En fyrir honum snerist frammistaðan um miklu meira en að setja heimsmet.
„Markmiðið með Heimsmetabók Guinness var aldrei metið sjálft,“ sagði hann. „Ég vildi vekja athygli um allan heim svo fólk beindi sjónum sínum í auknum mæli að hefðbundnum dönsum Afríku.“
Heimsmetabók Guinness hefur ekki enn staðfest hvort frammistaða Benjamins teljist gilt heimsmet. Staðfestingarferli samtakanna getur tekið tíma eftir mettilraun og endanleg niðurstaða ræðst af því hvort öllum reglum þeirra hafi verið fylgt.
Hvað sem því líður vonast Daniel til að gegna stærra hlutverki í framtíðinni við að kynna afríska menningu og danshefðir fyrir umheiminum.
Athugasemdir