Kærunefnd húsamála hefur úrskurðað að leigusölum sé heimilt að fá 295 þúsund krónur greiddar úr tryggingu leigjanda vegna leigusamnings sem leigjandinn rifti með ólögmætum hætti. Aðilar málsins voru ekki nafngreindir í úrskurðinum.
Málinu lauk með úrskurði kærunefndarinnar 24. september síðastliðinn en úrskurðurinn var birtur á netinu í byrjun október. Kærunefndina skipuðu í málinu Auður Björg Jónsdóttir lögmaður, Þorvaldur Hauksson lögmaður og Eyþór Rafn Þórhallsson verkfræðingur.
Deilan snerist um íbúð sem leigjandinn hafði samið um að taka á leigu frá 17. desember 2025 til ársloka 2026. Samningurinn var undirritaður rafrænt af aðilum 15. og 16. desember.
Leigjandinn hélt því fram að samningurinn hefði ekki tekið gildi þar sem hann hefði hvorki greitt fyrstu leiguna né fengið lykla að íbúðinni. Kærunefndin féllst ekki á þau sjónarmið og taldi bindandi leigusamning hafa komist á með rafrænum undirskriftum aðila.
Leigjandinn tilkynnti 19. desember að hann hygðist hætta við leiguna. Hann sagði samningnum síðan upp 22. desember og rifti honum formlega 30. desember.
Nefndin komst að þeirri niðurstöðu að riftunin hefði ekki átt sér stoð í húsaleigulögum og væri því ólögmæt. Leigusalarnir kröfðust 445 þúsund króna úr 600 þúsund króna tryggingu vegna ógreiddrar leigu.
Kærunefndin taldi þó að leigusalarnir hefðu átt að takmarka tjón sitt með því að leigja íbúðina aftur eins fljótt og mögulegt væri. Var miðað við að unnt hefði verið að koma henni aftur í leigu frá 15. janúar 2026.
Niðurstaðan varð því sú að leigusalarnir mættu ganga að tryggingu leigjandans fyrir 295 þúsund krónum.
Athugasemdir