Samþykkja umdeildar reglur á vinsælum ströndum Tenerife

Bæj­ar­yf­ir­völd í La Laguna á Tenerife hafa sam­þykkt nýjar reglur um umgengni á ströndum og við nátt­úru­laugar sveit­ar­fé­lags­ins. Meðal ann­ars verður bannað að reykja, gista og tjalda á svæð­unum.

Regl­urnar hlutu end­an­legt sam­þykki 7. októ­ber og ná meðal ann­ars til vin­sælla bað­staða í Bajamar, Punta del Hidalgo, Jover og La Barranquera. Mark­miðið er að auka öryggi, draga úr mengun og vernda líf­ríki við strönd­ina.

Samkvæmt regl­unum verða allar strendur og nátt­úru­laugar á vegum sveit­ar­fé­lags­ins reyk­laus svæði. Jafn­framt verður óheim­ilt að skilja eftir rusl eða annan úrgang.

Þá verður bannað að nota sápu, sjampó og sam­bæri­legar hrein­læt­is­vörur í almenn­ingsst­urtum og á baðsvæðum. Er því ætlað að koma í veg fyrir að meng­andi efni ber­ist í sjó­inn.

Tjald­stæði og gistinætur verða sömu­leiðis óheimil á þeim svæðum sem regl­urnar ná til. Notkun hátal­ara og ann­ars hljóð­bún­aðar sem veldur öðrum ónæði verður einnig bönnuð, nema í neyð­ar­til­vikum eða á við­burðum sem hafa fengið sér­stakt leyfi.

Viðurlög verða við brotum og fer þyngd þeirra eftir alvar­leika hvers til­viks.

Samhliða hertum reglum hyggj­ast yfir­völd bæta aðgengi að bað­stöð­unum, meðal ann­ars með sér­út­búnum hjóla­stólum og aðgengi­legum sal­ernum.

Regl­urnar gilda þó aðeins innan sveit­ar­fé­lags­ins La Laguna